Katungod sa Katabang Ipatuman

Ni Alex Mapoy

NLRC Caraga Administrative Officer V Robert M. Aying. Photo by
Alex Mapoy

BUTUAN CITY – Katungod sa katabang sa panimay ang pagdawat sa gitakdang minimum wage basi sa gitakda sa Republic Act 10361 o mas nailang Domestic Workers Act.

Nakalatid sa RA 10361, managlahi ang minimum wage nga pagadawaton sa katabang diin gikonsidera niini ang lokasyon.

Kon ang katabang nanarbaho sa National Capital Region, madawat niini ang P2,500 isip monthly minimum wage; P2,000 ang binulang suholan sa mga nagtrabaho sa chartered cities; ug P1,500 ang binulang sweldo sa mga nanarbaho sa lungsod.

Ang nahisgotang suholan gibase kini sa nakalabay’ng tuig nga minimum wage nga gi-aprubahan sa nagkadaiyang Regional Tripartite Wages and Productivity Board (RTWPBs).

Sa 2014 Edition nga Handbook sa Department of Labor and Employment (DOLE) partikular na sa Bureau of Working Conditions nga gihatag ni National Labor Relations Commission (NLRC) Caraga Administrative Officer V Robert M. Aying ning mantalaan, angayang ihatag sa employer ngadto sa katabang ang gitakda niining minimum nga suholan.

Angayang mapahimuslan usab sa katabang ang uban pang benepisyo sama sa day-off matag semana diin apil kini nga bayran sa amo, 5 ka adlaw nga service incentive leave sa matag tuig, 13^th month pay, SSS, Philhealth, Pag-IBIG, saktong pagtratar, libreng katulgan, katungod nga makagamit og komunikasyon sama sa telepono, libreng training, katungod nga mosalmot sa labor organization, katungod nga makahupot sa kopya sa employment contract, katungod nga makakuha og certificate of employment, katungod nga humanon ang kontrata, ug katungod nga mo barug sa kaugalingong relihiyon.

Niadtong employer nga mo supak sa maong kamanduan ang manubag kini sa balaud.

Tambag ni Aying sa tanang employer, tumanon unsa ang nakalatid sa balaud sanglit ang balaud, magpabiling balaud ug ni kinsa kadtong mo supak, ang taralon sa hukmanan.