Pagpanghatag og Patrol Cars, Dili Pamulitika - Roxas

Ni Alex Mapoy

Personal nga gitunol ni DILG Sec. Mar Roxas ang yawi sa bag-ong patrol car ngadto sa mga mayores sa Dinagat Island Province.  

CAGDIANAO, Province of Dinagat Island (PDI) – Giklaro ni Department of the Interior and Local Government (DILG) Secretary Mar Roxas nga dili pamulitika ang gihimo niining pagpanghatag og mga bag-ong police patrol cars ngadto sa kalungsoran sa tibuok nasod.

Sumala ni Sec. Roxas, gihimo lamang niini ang gipanumpaang trabaho ang paghatag sa insaktong serbisyo sa katawhang Pilipino ug isa na niini ang paghatag seguridad sa tibuok nasod.

Ang pagtunol og mga patrol cars maoy gituohan sa kalihim nga makapalig-on sa Philippine National Police (PNP) ang kahapsay ug kalinaw sa matag lungsod ingon man ang seguridad sa katawhan.

“Alam niyo po ay sala sa init sala sa lamig, kung hindi naman ginagawa ang trabaho, ang sasabihin, hindi ginagawa ang trabaho. Kung ginagawa ang trabaho, ang tatanungin, bakit ginagawa ang trabaho. Tayo naman, nakatutok lang sa ating tungkulin na siyang maghatid ng mga kasangkapan, mga kagamitan, at pangangailangan ng mga PNP para matugunan ang peace and order dito sa Dinagat,” pagklaro ni Sec. Roxas.

Una niini, nahimong mainiton ang pagsugat sa taga – Province of Dinagat Island (PDI) kang Sec. Roxas kinsa nituyo pagbisita sa probensya labi na sa lungsod sa Cagdianao aron nilawas nga itunol ang pito ka mga patrol cars sa mga lungsod nga sakop sa naasoy’ng probensya.

Nahimong benepisyaryo ang mga lungsod sa Basilisa, Cagdianao, Dinagat, Libjo, Loreto, Tubajon, ug San Jose  kansang mga sakyanan ang personal usab nga gidawat sa mayor sa nahisgutang mga lungsod.

Dumduman nga sa nakalabay’ng bulan, nakabisita usab ang kalihim sa dakbayan sa Butuan aron pangunahan ang pagtunol sa napulo ka mga patrol cars ngadto sa mga lungsod nga sakop sa probensya sa Agusan del Norte.

Pipila pa ka mga probensya nga nahatagan og mga patrol jeeps ang Albay, Sorsogon, Zambales, Bataan, Pampanga, Western Samar, Sarangani, South Cotabato, Bukidnon, ug daghan pang uban.