Kampanya Batok Drug ug Child Abuse Gipalapdan

Ni Alex Mapoy

Gatosan ka mga estudyante sa San Vicente National High School gipasabot kabahin sa kabahin sa RA 9165 ug RA 7610. Courtesy of BCPS1

BUTUAN CITY – Gipalapdan sa kapulisan sa dakbayan sa Butuan ang kampanya batok druga ingon man Child Abuse Awareness pinaagi sa pagpahigayon og symposium ngadto sa sekondaryang tunghaan partikular na sa San Vicente National High School, Brgy. San Vicente sakop ning siyudad adtong Bernes, Hunyo 26 ning kasamtangang tuig.

Sumala ni Butuan City Police Station 1 Commander PSInsp Nefre Telewik Acaso, daling gitubag sa iyang kadumalahan ang sulat hangyo ni Ronnel C. Fernandez, Guidance Counsellor sa maong tunghaan nga kon mahimo, magpahigayon kini og symposium kabahin sa druga ingon man Child Abuse.

Gidayeg usab ni PSInsp. Acaso ang lakang gihimo sa kadumalahan sa maong tunghaan sanglit nakatabang kini pagpalapad ug pagpakusog sa kampanya batok druga ingon man Child Abuse.

Ang paghatag symposium ngadto sa kapin 300 ka mga estudyante ang kabahin lamang kini sa pagselebrar sa Dangerous Drug Month.

Gipadala ni PSInsp. Acaso si Chief PCR/WCPD PSInsp. Marisan Liza Estrada uban ang pipila ka mga kaubanan ngadto sa maong eskwelahan aron magpahigayon og symposium ngadto sa Grade 9 ug Grade 10 students.

Unod sa leaflets nga gipanghatag ang kabahin sa RA 9165 ug RA 7610. Courtesy of BCPS1

Gituki sa grupo ni PSInsp. Estrada ngadto sa mga estudyante ang kabahin sa unod sa Republic Act (RA) 9165 o mas nailang Anti-Drug Law ingon man ang Republic Act (RA) 7610 o mas nailang Anti-Child Abuse Law.

Kabahin matod pa ni PSInsp. Acaso sa nahisgutang symposium ang pagpahigayon og Film Showing lambigit sa Anti-Human Trafficking in Person.

Gipasabot usab ni PSInsp. Estrada ang kabataan kabahin sa Child Abuse Law samtang gihisgotan usab ni Intel Investigator PO3 Mergel Anthony Plaza ang mga probisyones sa Anti-Drug Law.

Nipasibaw ang mga estudyante nga gikalipay nila ang maong kalihokan sanglit bisan luyo sa ilang linghod nga edad, duna silay nakat-onan kabahin sa gituki nga mga balaud.

Nanghinaut usab ang mga nahisgutan nga dili lang kini ang una ug kataposan nga symposium kondi masundan pa kini sa umaabot nga mga bulan aron madugangan pa ang ilang kahibalo.

Mapasalamaton usab ang mga nahisgutan ngadto sa kapulisan sanglit wala gipakyas ang hangyo sa ilang tunghaan nga mao usab ang ilang kagustohan nga mahisgotan.