Paspas nga Interbensyon Gitinguha

Ni Alex Mapoy

BUTUAN CITY – Paspas nga pagtunol sa interbensyon ngadto sa apektado sa kalamidad ang gusto sa kadumalahan sa Department of Agriculture (DA) Caraga.

Sumala ni Vanessa P. Sanchez sa DA Caraga, gi-awhag ni DA Caraga Regional Executive Director Edna M. Mabeza ang tanang nitambong sa Rehabilitation and Mitigation Planning Workshop and Action Planning for Disaster Risk Reduction for Agriculture labi na ang mga representante gikan sa Municipal Agriculture Offices ning rehiyon, Provincial Disaster Risk Reduction Management Offices, ug personahe sa rehiyonal nga buhatan nga magtinabangay aron mahatagan gilayon og tabang kadtong mga mag-uuma nga na apektohan sa kalamidad sama sa weak El Niño.

Pamugos ni Dir. Mabeza, kinahanglan nga ipadali ang pagsumite og report ug kinahanglan usab nga sakto ang isumite niining report aron mahatagan gilayon kini sa saktong sulbad.

Nipahimangno usab si Dr. Roberto Sandoval, Jr., representante sa United Nations Food and Agriculture Organization (UN FAO) ngadto sa mga nanambong nga dili angayang hulaton kanus-a mo igo ang kalamidad, hinono-a, mas maayo matod pa kining pangandaman pinaagi sa paghimo sa konkreto nga mga plano.

Gitin-aw ni Sandoval, dili lang kutob paghibalo sa mga inputs sa Disaster Risk Reduction, kondi, mas maayong dunay himuong kausaban sa na andan nga gihimo kon dunay kalamidad ingon man sa teknolohiya.

Alayon niini, gilauman nga magamit ang resulta sa gihimong Rehabilitation Planning ug SWOT Analysis sa DRR sa agrikultura aron masulbad ug mabatokan ang epekto sa huwaw sa umaabot nga panahon.