No Read No Write Gitabangan

Ni Alex Mapoy

Gipangunayan pagtudlo ni Principal II Celso Villamor Naranjo  ang kabataan kon unsaon pagbasa ug pagsulat. Photo by Neline Gambuay

BUTUAN CITY – Doble-kayod ang kadumalahan sa Mandacpan Elementary School pagtudlo sa mga estudyante kon unsaon pagbasa ug pagsulat.

Tuyo lamang niini nga adiser mahuman ang kasamtangang school year, makabalo nang mo basa ug mo sulat ang mga estudyante.

Mismo si Principal II Celso Villamor Naranjo ang nitabang na pagtudlo ngadto sa mga estudyante gikan sa Grade 1 hangtod Grade 6.

Nasayran nga ang mga estudyante gikan sa Grade 1 hangtod Grade 3, gitudloan ni Naranjo kon unsaon pagbasa ug pagsulat sa pinulongang Bisaya samtang ang mga estudyante gikan Grade 4 hangtod Grade 6, gitudloan kini unsaon pagbasa ug pagsulat sa pinulongang Ingles.

Sa unang cycle, natudloan sa opisyal ang mga estudyante nga hinay pa nga mo basa, dili kamao mo basa ug dili makasulat (No Read, No Write).

Matag adlaw, kapin sa isa ka gatos ka mga estudyante ang natudloan pagbasa ug pagsulat sa opisyal.

Dili matod pa lung-an pagtudlo sa opisyal ang mga estudyante hangtod dili kini makabasa ug makaantigong mo sulat.

Sa ikaduhang cycle, gilantaw sa opisyal nga paspas na kining mo basa ug mo sulat.

Bisan pa man, plano sa nahisgotan nga pag-abot sa Oktobre ning tuiga, iya kining i-assess kon makamao na ba gyud ang mga nahisgutan sa pagsulat ug pagbasa.

Kon mo gawas sa assessment nga dili pa makamao mo basa ug mo sulat, giklaro sa opisyal nga duna pay igong panahon aron matabangan ang estudyante.

Subay niini, gi-awhag usab sa opisyal ang tanang ginikanan nga tabangan usab ang mga anak kon unsaon pagbasa ug pagsulat sa ingon mas dali ang pagkat-on sa bata.

Sayod ang opisyal nga gumikan sa kadaghan sa mga estudyante nga tudloan, dili isa isa ang mapokusan.