Water Supply Is Back To Normal – Barquin

Ni Alex Mapoy

Tanker rationing sa Lower Mandacpan, Brgy San Vicente Butuan City adtong Hunyo 29 sa gabii. Photo by Alex Mapoy

BUTUAN CITY – Balik na sa normal ang suplay sa tubig sa dakong bahin ning dakbayan sa Butuan human ang pipila ka adlaw nga nawala ang suplay sa tubig labi na kadtong nahimutang sa ibabaw nga bahin tungod sa temporaryong pag-shutdown sa mga pasilidad nunot sa nasinatiang mga pag-ulan sa tibuok siyudad ingon man sa Watershed Forest Reserve sa Sitio Iyao, Brgy. Anticala ning siyudad sugod adtong Sabado.

BCWD Senior Public Relations Officer Ramil S. Barquin

Sa impormasyon nga gipaabot ni BCWD Senior Public Relations Officer Ramil S. Barquin, hingpit nang gihunong ang gihimong valve rationing kagahapon, alas-2:00 sa ka adlawon samtang ang lima ka mga dapit nga gilangkoban sa Bonbon, Lumbocan, Masao, Lower Mandacpan, ug Bit-os ang padayon nga gi-rasyonan og tubig pinaagi sa tanker sanglit ang maong mga dapit maoy kataposang maabot sa suplay.

“BCWD Update (July 1, 2015; 8:00am): Water supply is back to normal. Valve rationing ended at 2:00am. Water tankers are still serving residents in Bonbon, Lumbocan, Masao, Lower Mandacpan, and Bit-os as these areas are the last to be reached with normal water pressure,” pagkomperma ni Barquin.

Una nang gipasabot ni Barquin ang hinungdan kon nganong hinay ang water pressure samtang ang ubang parte sa siyudad ang walay suplay sa tubig sugod pa adtong Sabado mao ang grabe ka lubog sa tubig.

Dugang ni Barquin, taas kaayo ang turbidity level sa Taguibo river diin niabot kini og 500 NTU kansang kalubog ang dili matod pa makaya sa Infiltration Gallery hinungdan nga napugos ang water district og suspendi sa operisyon sa mga pasilidad sa Sitio Iyao.

Nakadugang matod pa sa opisyal ang sitwasyon sa yuta sa maong dapit nga dali lamang malaka o mabanlas sa tubig ulan hinungdan nga nalubog pag-ayo ang tinubdan sa tubig.

Padayon usab matod pa nga naka-apekto ang gisangpotan sa kanhi iligal nga kalihokan sulod sa watershed ug ang ubay-ubay nga imprastraktura nga padayong gitrabaho sa maong dapit.

“Over the weekend, concessionaires of the Butuan City Water District (BCWD) experienced low water pressure while some were waterless due to the continuous fall of rain at the Taguibo River Watershed Forest Reserve where the major source of BCWD’s water supply is located. The continuous fall of rain has greatly affected the quality of the Taguibo River with highest turbidity level reaching 500 NTU over the weekend,” pasabot sa opisyal.

Hisayran nga ang dakong bahin sa siyudad ang apektado sa pagkawala sa suplay, nimando si BCWD General Manager Engr. Anselmo Sang Tian nga magpahigayon og water rationing ngadto sa mga lugar nga walay agas pinaagi sa valving o kaha tanker sa ingon dunay magamit nga tubig ang mga konsumidor sugod adtong Lunes, Hunyo 26 ning tuiga.

Ang gi-rasyon nga tubig gikuha gikan sa Pump Station No. 1 sa water district.

Sa maong lakang, daling nagpagamit ang Equiparco Construction ug Agusan Filipino-Chinese Chamber of Commerce sa ilang mga tankers aron masuplayan og tubig kadtong dapit nga walay agas.

Bisan pa man, gi-angkon sa opisyal, dili tanang mga area nga walay tubig ang na abtan sa rasyon tungod sa ka limitado sa sakyanan nga naghakot og tubig nga gilangkoban sa

“To address the demand of the active BCWD concessionaires and with the unpredictability of the weather, as an immediate solution to the problem, BCWD began implementing water rationing through valving and tankers starting Monday, June 29, 2015 to be able to at least provide a little bit of water to its concessionaires for domestic use,” pag-angkon sa opisyal.

Sa gihimong water rationing, pipila ka mga konsumidor ang nadismaya human wala na abtan sa rasyon.

Bisan pa man, dunay pipila ka mga konsimidor sama kang Ailyn Legazpi taga – Brgy. San Vicente ning siyudad ang nipahayag nga nalipay kini sa gihimong inisyatiba sa water district.

Sayod si Legazpi nga band-aide solution lamang matod pa ang maong water rationing, apan sa maong paagi, nabati matod pa sa katawhan ang paningkamot sa buhatan.

Apan sa facebook account sa water district, usa ka konsumidor ang nipadayag nga dili lang unta kutob sa water rationing ang himuon sa buhatan kondi malahutayong solusyon sa dugay nang problema sa tubig ang gipangita sa katawhang Butuanon.

Bugtong tubag sa water district sa negatibong komento sa mga konsumidor, ilang nasabtan ang gibati sa katawhan dungan sa pagpangayo og dispensa sa kahasol nga nasinati kansang kahimtang sa watershed ang dili matod pa mapugngan.