Sunday, June 28, 2015

U4U Campaign Nagkalapad

Ni Alex Mapoy
PopCom Caraga Information Officer III and Technical Section Chief 
Rutchie C. Saluta. Photo by Alex Mapoy
BUTUAN CITY– Nagkadaghan ang grupo sa kabatan-onan ning rehiyon sa Caraga ang napailawom sa oryentasyon sa You-for-You (U4U) nga gipasiugdahan sa Population Commission (PopCom) Caraga.

Katuyoan sa U4U nga mapugngan ang “sexual risk behaviours” sama sa pre-marital sex, teenage pregnancy, ug sayong pagsulod sa kaminyuon, matuki ang nagkadaiyang reproductive health problems lakip na ang gitawag nga non-sexual risks sama sa pagpanigarilyo, pag-inom, ug pagamit sa gidiling druga.

Magsilbi usab kining paagi nga mahimong andam ang batan-on sa pag-atubang sa bisan unsang hagit sa kinabuhi sa tabang sa isigka-batan-on.

Segon ni PopCom Caraga Information Officer III and Technical Section Chief Rutchie C. Saluta, tudluan ang mga partisipanteng batan-on kon unsaon pagdala ang kaubanang batan-on nga dunay gihambin nga problema.

Mas epektibo matod pa ni Saluta nga ang batan-on maoy mo tambag sa isigka-batan-on kon duna kini suliran nga gihambin sanglit makonsiderang “at home” ug komportable ang hingtungdang batan-on sa pagpaminaw sa isigka-batan-on nga nitambag kaniya.

Sahi matod pa ang mga hamtong maoy mo tambag sanglit mas “authoritative” kini hinungdan nga ang batan-on nga problemado, maglisod og padayag sa kinatibuk-an niining suliran.

Gawas niana, pinaagi sa U4U, mahatagan sa haum nga impormasyon ang kabatan-onan sibo sa lebel sa pangidaron diin matabangan ang kaubanang batan-on pagsabot lambigit sa sexuality, pagpalambo sa saktong pamatasan, paghimo sa responsableng desisyon, ug ma-andam usab kini isip responsableng indibidwal.

Tanang estratihiya gihimo sa komisyon aron lamang magiyahan pag-ayo ang tanang batan-on ning rehiyon sa ingon magdako kini nga mahimong maayong ehemplo ug produktibong indibidwal sa gipuy-ang katilingban.

No comments:

Post a Comment