BPV Gibansay sa PopCom

Ni Alex Mapoy

PopCom Caraga Technical Section Chief and Information Officer
III Rutchie C. Saluta. Photo by Alex Mapoy

BUTUAN CITY – Subsob ang gihimong pagbansay sa Population Commission (PopCom) Caraga ngadto sa kabaranggayan aron makamugna og Barangay Population Volunteer (BPV).

Tuyo niini nga mas mapalapdan ug mapaabot sa komisyon ang programa ngadto sa kabaranggayan – ang Responsible Parenthood and Family Planning (RPFP).

Segon ni PopCom Caraga Technical Section Chief and Information Officer III Rutchie C. Saluta, duha ka batches na sa BPV ang napailawom sa pagbansay labi na sa mga siyudad sa Cabadbaran ug Butuan ingon man sa mga probensya sa Agusan del Norte ug Agusan del Sur.

Target sa komisyon nga makamugna og labing minus 1,310 ka mga BPVs sa tibuok rehiyon sa Caraga kansang ihap katumbas sa kinatibuk-ang ihap sa mga barangay ning rehiyon.

Dugang ni Saluta, lauman nga ang ihap unya sa mabansay nga BPV mo subra pa sa orihinal nga target sanglit dunay barangay nga dako ang area ug dako usab ang populasyon hinungdan nga mas nanginahanglan kini og subra duha ka mga BPV.

Sa kasamtangan, mokabat na sa 70 ka buok nga mga BPVs sa komisyon isip bunga sa unang duha ka batches sa pagbansay.

Gawas niana, nakig-alayon usab ang rehiyonal nga buhatan ngadto sa Department of Health (DOH) Caraga aron mahimong mas epektibo ang programa sanglit ang naasoy’ng ahensya maoy maghatag og “commodities” sa ingon mahimong konkreto ang plano sa magtiayon.

Ni-angkon ang opisyal nga kawang ang paningkamot sa komisyon kon pulos lamang kampanya ang himuon ngadto sa mga magtiayon diin walay commodities ang itunol aron makonkreto ang plano hinungdan nga nakig-alayon ang buhatan ngadto sa DOH sa ingon mahatagan kini og suplay nga magamit sa magtiayon sa pagplano sa mugnaong pamilya.

Subay niini, mapasalamaton ang liderato ni PopCom Caraga Regional Director Alexander Makinano sa DOH Caraga sanglit sento porsyento kining nisuporta sa programa sa komisyon.