Monday, June 22, 2015

3 Linog Nitay-og sa Caraga

Ni Alex Mapoy
BUTUAN CITY – Tulo ka higayon nga gitay-og ang rehiyon sa Caraga sa nakalabay’ng semana.

Pinakakusog nga pagtay-og nisukod og 3.4 magnitude ug ang pinakahinay nisukod sa 2.5 magnitude sa Richter scale.

Basi sa Philippine Institute of Volcanology and Seismology (PHIVOLCS), unang pagtay-og, nahitabo adtong Martes, Hunyo 16, alas-5:58:22 sa hapon nga dunay gikusgon nga 2.5 magnitude. Ang epicenter sa pagtay-og natala sa 13 kilometros sa sidlakang bahin sa lungsod sa Remedios T. Romualdez, Agusan del Norte. Duna kini gilagmon nga 17 kilometros ug gikaingong tectonic in origin.

Ikaduhang pagtay-og, nahitabo adtong Hunyo 19, Bernes, alas-10:49 sa buntag. Duna kini gikusgon nga 3.4 magnitude. Ang epicenter sa pagtay-og natala sa 73 kilometros sa sidlakang bahin sa Bayabas, probensya sa Surigao del Sur. Aduna kini gilagmon nga 21 kilometros ug gikaingong tectonic in origin.

Ulahing gitay-og ang dakbayan sa Tandag diin ang epicenter natala sa 25 kilometros sa sidlakang bahin sa nahisgutang siyudad. Dunay gikusgon ang maong pagtay-og sa 3.1 magnitude ug dunay gilagmon nga 20 kilometros. Tectonic in origin pa gihapon ang gitudlong hinungdan sa maong pagtay-og.

Ang tulo ka mga pagtay-og wala nibilin og damyos sa mga kabtangan o propidad sa mga Caraganons labi na sa mga residente sa nahisgutang mga lungsod ug siyudad.

Mahinumdoman adtong Marso 16, 2012, gitay-og sa 5.9 magnitude nga linog ang dakbayan sa Surigao diin daghan ang na angol. Sa maong adlaw, mao usab ang grand opening sa Gaisano Capital Surigao. Gibana-bana nga mokabat sa 6,000 ka mga tawo ang atua sulod sa maong mall dihang niigo ang linog hinungdan nga daghan ang na angol dihang nahitabo ang stampede.

No comments:

Post a Comment