Pinay Super Caring

Ni Alex Mapoy

BOI Caraga Acting Alien Control Officer Cesar Valdez.
Photo by Alex Mapoy

BUTUAN CITY – Super caring matod pa ang mga Pinay hinungdan nga daghang tigulang nga langyaw ang nituyo pag-anhi sa nasod aron mangita og asawa.

Kini matod pa ang hinungdan kon nganong daghang langyaw ang ni-aplay og permanent resident human nakakita og mapangasawa dinhe sa nasod.

Basi sa datos sa Bureau of Immigration (BOI) Caraga, dinhe lamang sa rehiyon, sa unang duha ka bulan ning tuiga, nisipa sa 189 ka buok mga langyaw ang ni-aplay og permanent resident.

Ang nahisgutang ihap mas taas kon itandi sa nakalabay’ng tuig sa samang period nga anaa lamang sa 145 ka buok.

Sumala ni BOI Caraga Acting Alien Control Officer Cesar Valdez, kasagaran sa mga nangaplay og permanent resident ang American national, British national, ug Australian national.

Dugang ni Valdez, kasagaran sa nahimong asawa sa mga nahisgutan ang mas bata pa kaayo kon itandi sa ilang pangidaron.

Pinasikad sa obserbasyon, sagad sa nahimong asawa sa mga langyaw’ng tigulang mao kadtong mga Pinay nga praktikal ang panghunahuna diin alang kanila, bahala’g tigulang basta makabuhi og pamilya.

Dili na bag-o kini nga senaryo sa bisan asang dapit sa nasod sanglit nahimo na kining normal nga ang langyaw’ng tigulang maminyo sa Pinay nga nag-edad 18 anyos pa taas.

Si Nanay Pering, taga – Brgy. Bading sakop ning siyudad, ni-angkon nga siya mismo ni awhag sa mga anak – babae nga mangita og foreigner nga kaminyoan aron duna matod pa kini kaduolan panahon sa panginahanglan.

Alang kaniya, kon duna siyay anak nga maminyo og foreigner, diha na unya makabaton kini og anak nga adunahan nga mahimong kaduolan labi pa nga ang mister niini, usa lamang ka asir sa swertres.