Piniriso Gitudloan Pag-Saving

Ni Alex Mapoy

MOA Signing between SSS AVP Northern Mindanao Division Atty. Edwin Alo, SSS Butuan City Branch Head Antonio Fabia, BJMP Warden JSInsp. Jonathan Baltar, JO1 Psychie Macagaan, & SSS Butuan AMS Head Ma. Zima Balansag. Photo by Alex Mapoy

BUTUAN CITY – Dako ang tinguha sa liderato sa Bureau of Jail Management and Penology (BJMP) Caraga nga kon mahuman sa mga piniriso pagserbisyo ang salaud nga nahimo, duna kini kapaninguhaan pag-abot nianang higayona.

Subay niini, nakig-alayon ang liderato sa Butuan City Jail ngadto sa kadagkoang opisyal sa Social Security System (SSS) Butuan aron mahatagan og katumanan ang dako niining tinguha nga matabangan ang mga piniriso nga makatigom gikan sa inadlaw niining kinitaan sulod sa selda.

Dali usab kining gisanong sa liderato ni SSS Butuan Branch Manager Antonio Fabia ang maong hangyo hinungdan nga gibida ug gilusad ang AlkanSSSya Program ngadto sa Butuan City Jail.

Mismo si SSS AVP Northern Mindanao Division Atty. Edwin Alo ang nanguna sa pagpasabot ngadto sa 98 ka mga piniriso nga gilangkoban sa 72 ka mga lalaki ug 26 ka mga babae sa benepisyong dala sa maong programa.

Gipaneguro ni Atty. Alo, ang pagka-membro unya sa SSS sa piniriso, maghatag kasegurohan sa maayo niining kaugmaon.

Tambag sa opisyal, batasanon lamang ang paghulog sa kaugalingong AlkanSSSya sanglit walay laing makapahimulos niini sa umaabot kondi ang hingtungdang piniriso ra usab.

Giklaro sa opisyal, ang pagka-priso dili makonsiderang babag aron ang matag usa, makabaton og tinigom aron kon kini makagawas na o kaha mahimo nang gawasnon, duna kini kapaninguhaan o himuong capital sa tukuron unya niining gamay nga negosyo.

Alayon niini, kinasingkasing nga nipaabot og pagpasalamat si Butuan City Jail, J/Insp. Raul Badillo sa kadumalahan sa SSS sa pakig-alyansa kanila nga mahatagan og katumanan ang maong tinguha alang sa kaayohan sa tanang piniriso.

Sumala ni J/Insp. Badillo, pinaagi sa maong programa, mas napaduol kanila ang serbisyo nga gihanyag sa SSS ug nilawas kini nilang mapahimuslan taliwala nga anaa sila sulod sa prisohan.

Isip paghatag kalig-onan sa maong programa, nagpinirmahay ang kadagkoang opisyales sa SSS ug BJMP sa Memorandum of Agreement (MOA).

Ang mga personalidad nga niperma sa nahisgutang kasabotan naglangkob nila SSS AVP Northern Mindanao Division Atty. Edwin Alo, SSS Butuan City Branch Head Antonio Fabia, , BJMP Warden J/SInsp. Jonathan Baltar, JO1 Psychie Macagaan, ug SSS Butuan AMS Head Ma. Zima Balansag.

Gisaksihan ang maong pinirmahay sa mga piniriso ingon man sa mga sakop sa media nga atua sa nasangpit nga aktibidad.

Mainiton usab nga gihangop sa mga piniriso ang AlkanSSSya Program pinaagi sa pagsulod sa pipila ka piso nga ilang tinipigan.

Walay limit kon pila ang mahulog sa piniriso sa kaugalingong alkansiya ug kon pila ang matigom niini sa tibuok bulan, mao usab kini ang magsilbi nilang SSS monthly remittance.

Pasabot ni Baltar, dunay inadlaw nga kita ang mga piniriso sanglit daghang livelihood programs ang ilang gipatuman sa prisohan aron duna kini mahimong kalingawan sa ingon dili kini makahunahuna sa pag-eskapo.

Kini usab ang naghatag kanila og giya kon nganong ilang nahunahunaan nga maghimo og alkansiya ang usa ka piniriso sanglit duna kini kita matag adlaw.