Pamuyo sa Drayber, Walay Umento

Ni Alex Mapoy

BUTUAN CITY – Walay umento ang kahimtang sa panginabuhi sa mga traysikad drayber taliwala pa man nga halos dili na matulog aron lamang dunay ikapalit sa inadlaw niining panginahanglan.

Sumala ni Tatay Isoy kinsa napulo ka tuig na nga nagmaneho og traysikad sa Langihan area ning siyudad, ting-ulan man o ting-init, naningkamot pa gihapon silang mga drayber og sikad nga mamasahero aron duna kini ikapalit og bugas pangkonsumo.

Dugang ni Tatay Isoy, ang kahimtang sa panginabuhi sa mga traysikad drayber makita sa senina nga gisuot diin nagkagidlay ug nagkalago sanglit wala matod pa kini budget alang sa pangpalit og senina.

Pamugos sa nauwahi, kinsa may molambo sa traysikad drayber nianang tag – P5 nga pletehan, apan nisabot usab matod pa sila sa ilang mga pasahero sanglit susama ra man usab nila kini og kahimtang.

Ang nakapait matod pa nilang mga traysikad drayber nga kon sila masakit, dili sila makapamasahero hinungdan nga mahimong makaluluoy ang ilang pamilya sanglit wala silay kita.

Gawas niana, ang ilang mga anak matod pa kutob lamang sa paglantaw sa mga dagkong eskwelahan sanglit maglisod sila pagpatungha.

Igo igo lang matod pa ang ilang kinitaan hinungdan nga ang kasagarang trabaho sa mga anak sa sikad drayber mao lamang ang pagka-tindera, tindero, o kaha drayber lang gihapon og sikad sama kanila sanglit ubos lamang matod pa ang edukasyon nga naabot.

Alang sa nauwi, bisan unsaon matod pa og hulagway, lisod gihapon ang ilang kahimtang.