Thursday, October 29, 2015

Piniriso Interesado sa Serbisyo sa Parole

Ni Alex Mapoy

BUTUAN CITY – Ubay – ubay nga mga piniriso sa Butuan City Jail ang nagka-interes nga magpailawom sa supberisyon sa Parole and Probation Administration (PPA) Butuan human kini napasabot atol sa gihimong information drive campaign sa buhatan kagahapon sa buntag.

Ang nahisgotang kalihokan gihimo subay sa pagselebrar sa National Consciousness (Nacoco) Week sa maong pasilidad.

Gipasabot nila Chief Probation and Parole Officer Cristina R. Argente ug Parole and Probation Office II Alex Castaños kon kinsa ang mahimong makapahimulos sa programang gihanyag sa buhatan sama sa probation, parole, ug pardon.

Mahimong probisyonaryo ang usa ka piniriso kon nakonbikto kini sa salaud nga nahimo kansang sentensya nga gipakanaug sa korte, wala nilagpas sa unom ka tuig nga pagkapriso.

Gikombinsi ni Chief Probation and Parole Officer Cristina R. Argente ang mga piniriso nga mo avail sa prebilihiyong gihanyag sa buhatan
Ang probisyonaryo, mahimong makagawas gikan sa prisohan subay sa mando sa korte, apan hugot kining panubayan sa naka-assign nga Parole and Probation Officer pinasubay sa mga kondisyones nga gikantar sa hukmanan.

Kadtong piniriso usab, mahimong mo aplay pagka-parolado kon siya nakonbikto ug nakaserbisyo sa minimum nga indeterminate sentence pinaagi sa Board of Pardons and Parole pinasubay sa nakalatid nga kondisyones.

Puwede usab nga mo aplay ang piniriso nga mahimong pardonado kon kini nakaserbisyo sa pipila ka bahin sa gipahamtang nga sentensya ug imando sa presidente sa nasod nga kini pagawason ubos sa mga kondisyones nga angay pagatumanon sa nauwahi.

Gipasalig sa parole chief sa tanang piniriso nga kanunay bukas ang ilang buhatan niadtong mga binilanggo nga gustong mopahimulos sa bisan asa adtong tulo nga nahisgotan.

No comments:

Post a Comment