Butuan Daghay Makililimos

Ni Alex Mapoy

Gipanghambog nga highly urbanized city ang Butuan, apan makita sa pipila ka bahin sa nag-unang kalsada ug sa baba mismo sa Saint Joseph Cathedral, dunay pipila ka mga tawo naglinya aron magpakilimos

BUTUAN CITY – Taliwala nga nahimong 13^th Most Competitive Highly Urbanized City ang siyudad sa Butuan sa tibuok Pilipinas, apan, nahimo pa gihapon kining puy-anan sa mga makililimos.

Kasagaran makita ang mga nagpakilimos, anaa sa kanto J.C Aquino Avenue ug Montilla Boulevard; J.C Aquino Avenue ug J. Rosales Avenue duol sa Gaisano Mall ug bisan sa ganghaan nga bahin sa Saint Joseph Cathedral ning siyudad, adunay mga tawong naglinya aron magpakilimos sa ingon dunay ikapalit sa inadlaw niining panginahanglan sama sa pagkaon.

Hisayran nga gawas sa taga – Butuan nga makililimos, nadugangan pa sa mga pamilyang Badjao nga nidagsa sa dakbayan kinsa nagpakilimos usab.

Gikabutyag ni Ricky Casiles, kinsa igo lang nikanaug tungod sa Chow King sa sentrong bahin ning siyudad, isa ka inahan nga dunay dala nga bata ang nisugat kaniya ug gipangayuan sa pipila ka peso.

Dugang ni Casiles, bunga sa kaluoy, iyang gihatagan ang maong mag-inahan og P5, apan imbes matod pa magpasalamat kaniya, giingnan pa siyang kuripot.

Nibati og ka insulto ang nauwahi, apan gipugngan na lamang ang iyang kaugalingon sa ingon dili kini makapagawas sa masakit nga pulong dungan sa panghinaut nga mo lambo na ang siyudad aron wala nay Butuanon nga nabuhi sa pagpakilimos.

Dumduman nga adtong Agosto 19, 2015 atol sa State of the City Address (SOCA) ni Butuan City Mayor Dr. Ferdinand Amante Jr. gipaabot sa opisyal ang mga kalamboan nga nahitabo ning siyudad ilawom sa iyang administrasyon.

Labaw pa nga gipasigarbo sa opisyal ang pagkahimong 13^th Most Competitive Highly Urbanized City sa Butuan sa tibuok Pilipinas ug ikatulo sa Mindanao diin nag-una ang Davao, Cagayan de Oro, ug Butuan nga makonsiderang Most Competitive Highly Urbanized City.

“Our strict adherence to the “Tuwid na Daan” led to our rise in the National Competitiveness Rankings. After a more comprehensive evaluation, Butuan City is ranked as the 13^th Most Competitive Highly Urbanized City in the entire country and 3^rd in Mindanao after Davao and Cagayan de Oro. Remarkably, the same evaluation report ranks Butuan City as the No. 1 for Transparency among all LGUs in the entire country,” tipik sa mensahe ni Mayor Amante sa pinakaulahing SOCA adtong Agosto ning tuiga.