Personahe Gipailawom sa Special Training

Ni Alex Mapoy

PPA Caraga Regional Director Josefina Cinco

BUTUAN CITY – Mokabat sa 30 ka mga personahe ug Volunteer Probation Aides (VPAs) sa Parole and Probation Administration (PPA) Caraga ang gipailawom sa Therapeutic Training sa Balanghai Hotel ning siyudad adtong adlaw’ng Bernes.

Hisayran nga ang tanang nitambong sa maong kalihokan na gikan pa sa nagkadaiyang bahin ning rehiyon kinsa nagpadayag sa ilang kasibot nga madugangan pa ang ilang kahibalo.

Gikabutyag ni PPA Caraga Regional Director Josefina Cinco, tumong sa kalihokan mao ang pagbansay sa mga nahisgotan sa ingon kini mahimong epektibo sa tagsa – tagsa ka tahas o kaakohan nga gisangon ngadto kanila.

Dugang ni Cinco, special ang maong training sanglit madugangan ang kahibalo sa mga nahisgotan ug mas ma-familiarize pa ang ilang mga responsibilidad.

Malaumon ang direktor nga pinaagi sa maong pagbansay, daghan pa nga mga napriso ang matabangan nga makagawas gikan sa bilanggoan ug mapailawom sa superbisyon sa ilang buhatan sa ingon magiyahan kini nga magpuyo sa kinabuhing matarong.

Ang maong kalihokan, kabahin lamang sa ubay – ubay nga mga inisyatiba nga gihimo sa rehiyonal nga buhatan alang sa mas epektibo nga panirbisyo.

Hisayran nga sa tibuok rehiyon, kapin 700 ka buok ang VPAs sa buhatan kinsa mainitong nisuporta sa tanan niining programa labi na sa paggiya sa 1056 ka mga probationers ug parolees.