Pagsaka sa Kasong Drugas, Gikasakit

Ni Alex Mapoy

Ronnie Vicente “RCL” Lagnada

BUTUAN CITY – Gikasakit sa inilang negosyante sa dakbayan sa Butuan ang padayon nga pagsaka sa kaso sa gidiling drugas.

Pakyas ang awtoridad pagsumpo sa drugas taliwala pa man sa hugot niining kampanya nga kini maundang.

Mayorya sa mga binilanggo sa Butuan City Jail ang na priso tungod sa pagkalambigit sa drugas kinsa pipila kanila ang nagpayuhot samtang ang uban nabuang sa paggamit niini.

Sumala ni Ronnie Vicente “RCL” Lagnada, isa ka inilang negosyante ning siyudad, gikasakit niya ang gidangatan sa mga nalambigit sa drugas sanglit sayod siya nga wala nangandoy ang mga nahisgotan nga magpuyo sa kinabuhing dili gawasnon.

Dugang ni RCL, isa sa nakitang hinungdan nganong napugos ang mga nahisgotan pagpayuhot sa gidiling drugas o kaha pagpakabuang sa drugas tungod sa kawad-on ug walay trabahong kasudlan.

Alang ni RCL, kon mahatagan lamang sa maayong oportunidad ang katawhan sa dakbayan sa Butuan nga makatrabaho, wala nay magpakabuang pa sa drugas o kaha magpayuhot sanglit duna naman kini klarong panginabuhian.

Dili usab buot ang nahisgotan nga maguba lamang ang maayong kaugmaon sa mga Butuanon tungod sa drugas.

Kahibaloan nga gipamugos sa mga Butuanon historian, wala pa ang Pilipinas, anaa na ang Butuan, apan ang kalamboan sa siyudad, wala nakaapas sa dakbayan sa Davao, Cagayan, Cebu, ug uban pang mga siyudad nga ulahing nahimugso.

Bisan pa man, malaumon pa gihapon ang naulahi nga mapalig-on ang ekonomiya sa siyudad pinaagi sa pag-imbitar sa daghang imbestor nga mo bubo og dakong puhonan sa ingon dunay daghang trabaho ang mahimong kasudlan sa mga Butuanon ug niana, mawagtang ang isyu sa drugas.

Sa maong tinguha, nanghinaut si Tatay Dodong, isa ka traysikol driver nga makabaton na unta ang siyudad og isa ka lider nga sama og panglantaw ni RCL.