IPs Gitabangan; Binhi Gitunol

Ni Alex Mapoy

BINHI. Gituohan ni DA Caraga Public 

Relations Officer II Aurelius P. Arais 

nga madugangan ang kinitaan sa mga 

lumad pinaagi sa gitunol niining mga 

binhi sa utanon.

BUTUAN CITY – Daghan nga mga lumad sa nagkadaiyang bahin ning rehiyon sa Caraga ang nakadawat og mga binhi sa nagkadaiyang klase sa utanon gikan sa Department of Agriculture (DA).

Ang maong pagpanghatag sa ahensya gihimo isip pagduyog sa ika-18 nga tuig sa kasumaran sa Indigenous Peoples' Rights Act of 1997” (IPRA).

Gikabutyag ni DA Caraga Public Relations Officer II Aurelius P. Arais, walay gipili ang rehiyonal nga buhatan kon hisgotan ang paghatag serbisyo sanglit ang ahensya gimugna alang sa tanan.

Dugang ni Arais, gawas sa mga binhi sa gulay, gihatagan usab ang mga lumad og mga basahon kansa gilauman sa opisyal nga makahatag giya sa mga lumad alang sa pagtikad sa kaumahan.

“Mag-apud-apod kita og mga seeds, mga utanon, mga gulayon aron ipanghatag sa atong mga IPs nga ania karon. Gawas niana, maghatag pud ta og mga balasahon nga makatabang unya sa ilang pagpanguma,” pahayag ni Arais.

Ang gipanghatag nga binhi sa utanon ang dako na kaayo og tabang sa panginabuhi sa mga lumad sanglit kon ma-atiman lamang kini pag-ayo, mahimo kini nga dugang kinitaan sa mga nahisgotan.

Niadtong gusto nga mopahimulos sa serbisyo sa ahensya, tambag sa naulahi nga mo dangop lamang sa Local Government Unit (LGU) labi na sa Municipal Agriculture’s Office o kaha sa City Agriculture’s Office aron kini magiyahan.

“Ang atong rehiyonal nga buhatan, mga higala, wala nagpili kon kinsa ang atong serbisyohan – ma-lumad man o unsa nga klase nga tawo, bukas ang atong buhatan pinaagi sa atong mga municipal agriculture’s office o ba kaha sa ilang city agriculture’s office.  So, bisan kinsa nga gusto nga mo avail sa serbisyo sa atong opisina, welcome kaayo kana. Mo agi lang sa atong local government units (LGUs) aron ato kana ma-asisan,” pagdasig sa opisyal.