Bakakon Isyu Gikasuko

Ni Alex Mapoy

BAKAKON ISSUE. Giangkon ni Butuan City 

Councilor Engr. Sergio “Serge” Pascual nga 

siya ang gitumbok sa artikulo nga “Konsehal 

Gitudlong Bakakon” dihang nahinabi sa news 

team pinaagi sa cellphone sa mismong 

secretary.

BUTUAN CITY – Walay lipud-lipod nga giangkon ni Butuan City Councillor Engr. Sergio “Serge” Pascual nga nasuko kini sa Mindanao Centro Daily human gimantala ang artikulo nga “Konsehal Gitudlong Bakakon” adtong Martes, Oktobre 13, 2015.

Sumala ni Pascual, nasuko siya sa mantalaan sanglit wala siya kuhai og komento bahin sa maong artikulo.

Bunga sa kasuko, gipatas-an pa niya og tingog ang babaeng reporter nga si Angel Gaviola adtong Martes, sa Session Hall mismo sa Butuan City Hall ug adtong tungora, nabaling ang atensyon sa mga tawo nga atua sulod sa maong dapit kanila.

Pamugos ni Pascual, ang maong artikulo gipagawas aron ipagawas nga siya usa ka bakakon nga unta pila ra man matod pa pagtawag kaniya o kaha pagbisita sa iyang opisina aron mahatag ang dokumento.

“Nasuko ko ana kay ngano man nga wala ninyo gikuha ang akong side. Dapat unta, naa man mo sa media, sa print media, dapat para makuha ninyo ang fair reporting, dapat kuhaon sab ninyo ang side sa usa ka tawo pareha nako. Dili kay idiretso lang ninyo nga, nga murag kuan ba nga nigawas, ipagawas ninyo nga bakakon ko. Pila ra man pagtawag ninyo sa ako or pagbisita ninyo sa ako opisina, para mahatag nako ninyo ang mga dokumento nga wala ko nagbakak kana,” pag-angkon ni Pascual.

Tungod sa kasuko sa konsehal, gibanghagan pa niya ang babaeng reporter ug mipasangil nga nawong og kwarta ang Mindanao Centro Daily.

Dihang gihinabi ning mantalaan ang opisyal pinaagi sa cell phone sa iyang secetary, giklaro niini nga wala niya direkta nga gisulte nga nawong og kwarta ang Mindanao Centro Daily kondi basin matod pa na apil na kini nga nabayran.

Gi-akusahan pa niya ang mga radio stations ning siyudad nga napalit sa pulitiko diin ang mga komentarista matod pa gibayran og tag – P500,000; P400,000; ug P350,000.

Plano pa sa opisyal nga magduso og motion sa Committee on Media Affairs aron ipatawag ang tanang media sa ingon imbestigahan ang maong isyu.

“Dili directly nako gisulte nga nawong og kwarta. Ang gisulte lang nako nga BASIN NA APIL NA MO. Ha? sa pagpamalit kay ang mga radio station, mga radio station, huh. Ang tanan nga mga prime time, gipalit na ang air time, nagamit og laing tawo. Ang tanan halos nga mga komentarista, napalit na. Tan-awon nimo, maminaw ka sa mga radio station. Mao to nga gusto nako, ipatawag mo diha sa Committee on Media Affairs para ma-imbestigahan nato na... So kon ang inyong newspaper, wala na apil ana, dapat, isulte na ninyo nga wala mo na apil ana,” alegasyon sa nauwahi.

Niangkon usab ang opisyal nga ipa-suspendi ang Business Permit sa Mindanao Centro Daily kon iyang mapamatud-an nga one-sided kini sanglit makahatag matod pa kini og dili maayong impormasyon sa katawhan.

“Ang ako, tinuod na. Nagkuan ko nga kon mo gawas na nga one-sided mo, paper manang inyo. Ang ako ba, Lex, kon magpagawas mo og estorya, ang ako lang gipangayo nimo, be fair and honest in your reporting. Kun dili mo mahimong honest ug dili mo mahimong fair, then, ako mismo mag-move ko nga ipa-suspend ang inyong kuan, ang inyong business permit kay ngano man? Makahatag man mo og dili maayo nga balita sa katawhan niana,” laing pag-angkon sa opisyal.

Subay sa reaksyon ni Konsehal Pascual, ang Mindanao Centro Daily nagtin-aw nga sa kinatibuk-ang unod sa artikulo nga “Konsehal Gitudlong Bakakon,” wala naghisgot sa pangalan sa nasangpit nga konsehal ug labaw na usab nga wala kini naghisgot kon asa nga siyudad nagserbisyo ang gitumbok nga konsehal.

Giklaro usab sa opisyal nga bisan wala napatik ang iyang pangalan, apan, walay laing konsehal nga gitumbok sa maong artikulo kondi siya lamang sanglit siya lang matod pa ang bukal sa maong hisgotanan.

“Oh, pero kinsa may gitudlo na ninyo, konsehal man sa Butuan. Oh, di bisan wala ninyo gibutang ang akong pangalan niana, pero indirectly or directly, ako na ang inyong gikuan ana. Kay kinsa man nga konsehal nga bukal kabahin ana, ako ra man. Mao na ang akong hangyo sa inyo, fair lang, dili man ko pareha sa uban nga pagkatao. Kay ako, mogawas ang balita nga dili tinuod, mo reak ko ana,” pagtin-aw sa opisyal.