Monitoring sa Terminal ug Kadalanan Gipahugtan

Ni Alex Mapoy

DOTC Caraga Operations Division
Chief Engr. Eugene Rula

BUTUAN CITY – Hugot nga monitoring ang gihimo sa Department of Transportation and Communication (DOTC) Caraga sa nagkadaiyang terminal ug kadalanan labi na nga taliabot ang Kalag-Kalag.

Sa gilusad nga Oplan Kahapsay (OK), mahimong hapsay ang dagan sa trapiko ingon man ang kadalanan kansa maoy agian sa mga biyahidor ngadto sa tagsa-tagsa ka mga destinasyon.

Gikabutyag ni DOTC Caraga Operations Division Chief Engr. Eugene Rula, katuyoan sa OK nga programa, mahatagan sa mas luwas nga biyahe ang mga biyahero.

Ilawom sa programa, estriktong ipatuman ang lagda sa trapiko uban sa pag-abag sa mga hingtungdang ahensya sa goberno sama sa kapulisan.

“Oplan Kahapsay (OK) aims to promote order on the road and terminals by constant monitoring and enforcement of land transportation laws in coordination with proper authorities in order to ensure road safety.”

Gilauman nang daan sa opisyal nga sama sa nakalabay’ng katuigan, ang panahon sa Kalag-Kalag, manguli kadtong mga nanarbaho sa lagyong dapit aron managkot ngadto sa lubong sa mga minahal sa kinabuhi.

Nanghinaut na lamang ang opisyal nga mahimong matinumanon sa lagda sa trapiko ang mga biyahero labi na kadtong mga nagmaneho og sakyanan sa ingon dili kini madisgrasya o kaha mapahamtangan og multa.

Walay lain matod pang tuyo sa ahensya kondi ang paghatag kaluwasan sa tanang “road users.”