2 Pasilidad sa PPP Project Nag-Full Blast

Ni Alex Mapoy

PPP Project. Nag-full blast na ang duha ka mga pasilidad sa Taguibo Aquatech Solutions Corporation (TASC) nga kabahin sa Public – Private Partnership (PPP) Project sa Sitio Iyao, Barangay Anticala ning siyudad.

BUTUAN CITY – Gikomperma sa kadumalahan sa Butuan City Water Disrict (BCWD) nga nag-full blast na ang Taguibo Water Supply Development ug Water Treatment Facility Service Project sa Sitio Iyao, Barangay Anticala sakop ning siyudad bag-ohay lamang.

Nagtimaan kini nga hingpit nang matilawan sa tanang konsumidor ang serbisyo sa Taguibo Aquatech Solutions Corporation (TASC) adiser mahuman ang kasamtangang tuig.

Langkob sa maong proyekto ang Sabo Dam nga maoy magsilbing first line defense batok sa mangligid nga mga debris ug mga bato.

Sumala ni BCWD Senior Public Relations Officer Ramil S. Barquin, dili makonsidera ang nasangpit nga dam nga maoy mo pugong sa tubig, hinono-a, magsilbi kining giya sa tubig nga mo dagayday ngadto sa “catchment area” – ang Impounding Weir dis-a matigom ang bultong tubig nga kayang mo suplay og tubig sa tibuok siyudad sa halos isa ka bulan.

Dugang ni Barquin, magpadayon sa gihapon nga mo dagayday ang tubig sa suba isip pagseguro nga magpadayon ang suplay sa tubig.

Hisayran nga lakip sa Joint Venture ang pagmuntar sa “state-of-the-art Water Treatment Plant” nga makonsiderang “cost-effective” ug “efficient.”

Kaya matod pa kining mo sala hangtod 1,000 NTU sanglit duna kini duha ka stage filtration process.

Gikonsidera usab sa mga eksperto nga “high-end advanced technology invention” ang maong matang sa pasilidad sanglit aduna kini duha ka reactor – ang coagulation ug flocculation.

Alayon niini, gikalipay sa kadumalahan sa buhatan nga pinaagi sa nasangpit nga proyekto, mahatagan na sa malungtaron nga solusyon ang dugay nang suliran sa suplay sa tubig panahon sa ting-ulan.