Konsehal Gitudlong Bakakon

Ni Alex Mapoy

BUTUAN CITY – Usa ka konsehal sa usa ka siyudad ang gitumbok nga utok sa pagsabwag sa mga bakak nga kasayoran kabahin sa matod pa nahitabong anomaliya sa pag-award sa Department of Public Works and Highways (DPWH) sa multi-billion projects ngadto sa winning bidder sa 123.5-kilometer Surigao-Davao-Surigao (Lipata)-Agusan del Norte road construction.

Katuyoan matod pa sa maong konsehal mao lamang ang paglangan sa implementasyon sa nasangpit nga proyekto sa goberno human wala tugti sa DPWH nga makaapil sa bisan unsang proyekto tungod sa gikaingong “derogatory record” sa mga proyektong gipatuman.

Sumala ni Assistant Secretary Gilberto Reyes, dihang nahinabi sa mga media practitioners sa dakbayan sa Davao, isa ka konsehal sa isa sa mga siyudad ang nisuway paglanganlangan o pagbabag sa pagpatuman sa nasangpit nga proyekto.

Wala hinuon panganli sa kalihim kon kinsa nga konsehal ang nisuway pagbabag sa nasangpit nga proyekto.

Dugang ni Asec Reyes, ang gihimo sa maong opisyal hugot nga gikondina sa ahensya dungan sa pagklaro nga dili kini molampos sanglit ang kinabag-ang katawhan maoy nanginahanglan sa proyektong imprastraktura ug dili siya (konsehal) nga walay laing gilantaw kondi ang kaugalingong interes.

Basi sa nanggawas nga report, ang proyekto gipundohan matod pa sa goberno og balor P2.5 bilyones, apan ang nahitabo, gipadaug sa DPWH ang bidder nga joint venture sa Equi-Parco Construction Co. ug Hebei Road and Bridge Group Co. Ltd. nga naghanyag og bid price nga P3.3 bilyones.

Ang maong bid price mas dako kon itandi sa pundong gigahin sa goberno alang sa maong proyekto balor P2.5 bilyones.

Gitin-aw matod pa ni Asec. Reyes nga ang nanggawas nga reports, pulos walay basehan, dakong bakak, ug dakong sayop.

Pasabot sa opisyal, nidaug ang Equi-Parco ug Hebei Road sa bidding sanglit sila lamang ang nakasumite sa kompletong rekisitos.