Tuesday, October 13, 2015

Tribong Manobo Interesado sa NGP

Ni Alex Mapoy
DENR Caraga Communication and Development Office Supervisor Eric Gallego



BUTUAN CITY – Gikomperma sa liderato sa Department of Environment and Natural Resources (DENR) Caraga nga interesado ang tribong Manobo nga molambigit sa National Greening Program (NGP) nga gipatuman sa ahensya.

Sumala ni DENR Caraga Communication and Development Office Supervisor Eric Gallego, nagka-interes ang tribong Manobo human nakita ang kalamboan sa mga Community Based Forest Management (CBFM).

Dugang ni Gallego, isa sa nahimong ehemplo mao si Datu Subang sa lungsod sa Sibagat, Agusan del Sur kinsa nalantawan sa tribong Manobo nga dakong sapi ang mapaabot sa nauwahi kon ma-harvest na ang mga kahoy nga tinanom tungod sa NGP.

Gitin-aw sa opisyal, ang abot sa tinanom nga kahoy mapaingon sa bulsa sa nag-atiman niini.

Nindot matod pa ang maong programa sanglit ang ahensya maoy maghatag sa libre nga semilya, giyahan pa kini unsaon pagpadako, ug kon kini ma-harvest, ang goberno dili na mangayo sa halin niini.

Alayon niini, gitambagan ni DENR Caraga Regional Director Nonito Tamayo ang maong grupo nga makig-alayon sa pinakaduol nga buhatan sa CENRO sa ingon matabangan ug magiyahan kon unsaon sa pag-avail.

Una nang gikonsidera sa opisyal nga malamposon ang maong programa tungod sa kadaghan sa mga CBFMs ang natabangan ug kadaghan usab sa mga grupo nga nisuporta ug nitanom. 

No comments:

Post a Comment