IP Summit Gidagsa

Ni Alex Mapoy

Kadagkoang opisyal sa nagkadaiyang tribo sa rehiyon sa Caraga uban ang mga ginsakpan.

BUTUAN CITY – Gatosan ka mga tribong lumad ang nagkatigom sa unang duha ka adlaw nga Indigenous Peoples Summit diha sa Capitol Covered Court, Capitol Compound sakop ning siyudad sa Butuan kagahapong adlawa.

Katuyoan sa panagtigom mao ang pagsaulog sa ika – 18 ka tuig nga kasumaran sa pagkamugna sa Republic Act 8371 o mas naila nga Indigenous Peoples’ Rights Act (IPRA).

Gipakita sa mga lumad ang ilang mga talento isip pagpadayag sa ilang kalipay nga gumikan sa maong balaud, nahimong legal ang gipanag-iyahan niining yuta.

Positibo usab ang panglantaw sa mga nanambong nga lumad nga mas mahatagan pa og igong ngipon sa goberno ang implementasyon sa naasoy nga balaud.

Tanang mga ahensya sa goberno nga nihatag suporta sa kalihokan ang naghatag sa libre nga serbisyo ngadto sa mga lumad nga nanambong.

Pipila sa mga ahensya sa kagamhanan ang hugot nga nipakita sa ilang suporta sama sa Department of Health (DOH), Department of Interior and Local Government (DILG), Department of Agriculture (DA), Philippine Health Insurance Corporation (PhilHealth), Philippine National Police (PNP), Armed Forces of the Philippines (AFP), Philippine Information Agency (PIA), National Commission on Indigenous People (NCIP), ug daghan pang uban.

Gipangunahan ang maong kalihokan sa NCIP Caraga sa pagpanguna ni Regional Director Atty. Pinky Grace Pareja-Pabelic kansang aktibidad gisabak sa tema, “Lupaing Ninuno Kilalanin at Igalang; Sa Pagbabago ng Kalikasan, Katutubong Kaalaman at Kasanayan ay Pagyamanin at Isabuhay.”