Implementasyon sa IPRA, Epektibo?

Ni Alex Mapoy

Pianing Tribal Chieftain Bobby Javier uban ang kaubanang lumad

BUTUAN CITY – Epektibo alang sa mga lumad ang pagpatuman sa goberno sa Republic Act 8371 o mas nailang Indigenous Peoples' Rights Act (IPRA) of 1997 sa tibuok nasod.

Hisayran ang maong balaud gipatuman sukad atong tuig 1997 kansang balaud naghatag panalipod sa mga lumad nga matitulohan ang yuta niini nga kabilin.

Sumala ni Tribal Chieftain Bobby Javier, tungod sa maong balaud, nakabaton og Certificate of Ancestral Domain Title (CADT) ang 5,060 ka ektarya niining yuta nga kabilin sa Barangay Pianing ug Barangay Anticala sakop ning siyudad sa Butuan.

Dugang ni Javier, pinaagi sa maong balaud, nahatagan og hinagiban ang tribong lumad aron legal nga maangkon ang yutang kabilin nga ilang gipuy-an.

 “Epektibo kaayo kay mao mani siyay naghatag hinagiban sa mga tribong lumad nga nasakop sa Republic Act 8371 kanang IPRA. Epektibo kaayo,” pahayag ni Datu Javier.

Ang Barangay Pianing ug Barangay Anticala ning siyudad maoy na sulod sa CADT 135.

Gitin-aw sa opisyal, ang nanag-iya sa CADT 135 mao ang komunidad sa mga lumad o ang tanang namuyo sa nasangpit nga mga luna maoy tag-iya.

“Kami sa Pianing ug Anticala, usa man mi ka CADT. CADT 135 ang among yutang kabilin. Ang nanag-iya sa CADT mao ang komunidad. Ang na sulod sa CADT nga mga tribo, isa sila sa mga nanag-iya sa tituladong yuta sa tribo,” pagklaro sa opisyal.

Alayon niini, nanghinaut ang nauwahi nga magpadayon ang maong balaud aron matitulohan ang tanan nga yutang kabilin nga gipanag-iyahan sa tribo.