Ambisyon Pagka-Liga President, Dakong Bakak

Ni Alex Mapoy

Doongan Barangay Captain Bert Enriquez

BUTUAN CITY – Wala nahangol ug nangambisyon si Doongan Barangay Captain Bert Enriquez sa pagka-Liga President sukwahi sa alegasyon ni ABC President Nestor Amora batok kaniya nga interesado kini sa maong puwesto.

Sumala ni Enriquez, wala siya nangandoy sa maong puwesto dungan sa pagklaro nga dili angayang ilihis ni Amora ang isyu kondi dawaton ang kamatuoran nga nawad-an na og pagsalig ang mayorya sa mga kapitan ning siyudad kaniya.

Dugang ni Enriquez, tungod sa maong kamatuoran, mas maayo matod pa kini nga mag-voluntary resign kana kon duna kini konsensiya.

”Kanang plano nga interesado nga mahimong ABC President, layo na sa tinuod. Wala na sa akong bokabularyo, pero kon ihatag na, so what, demokrasya gyud ta. Mag-unsa na lang ang dagan sa Liga kon ang majority, wala nay trust and confidence sa presidente. So, kana ang iyang tan-awon. Dili niya ilihis ang isyu. Actually, wala gyud koy intention nga mag-Liga President,” pagklaro ni Enriquez.

Gitin-aw pa sa kapitan, siya ang nag-preside sa meeting sa mga kapitan adtong Oktobre 7 sanglit wala si Amora ug siya usab ang gibotohan sa mayorya nga mag-preside sa tigom.

Nagsilbi matod pang temporary nga presiding officer adtong tungora sa pagpili sa pormal nga mag-preside sa meeting mao si Kapitan Leonora Carabuena ug sa maong botohay, siya ang gipili nga mag-preside sa meeting.

“Ako, wa gyud ko nag-expect kay the Local Government Code states that when the absence of the presiding officer – the president, the majority of the members who are present can elect among themselves. So, nakaplastar man ang majority, adtong October 7 nga meeting sa mga kapitan, gipadayon namo ang session. Ang nag-preside ato, Hon. Leonora Carabuena. Then, Hon. Carabuena presided the proper election for the presiding officer. Fortunately, ako ang napili nga mag-preside sa meeting, so, wala koy mahimo. So, I presided that meeting,” pagtin-aw sa opisyal.