Konsumidor Gidasig Pagpa-Enroll

Ni Alex Mapoy

OBI: Know your monthly water bill. Enrol in our Online Billing Inquiry, pagdasig ni BCWD SPRO Ramil S. Barquin. Photo courtesy of BCWD.

BUTUAN CITY – Mayorya sa mga konsumidor sa Butuan City Water District (BCWD) ang adunay access sa internet hinungdan gipahimuslan kini sa water district aron mapasayon ang pagtunol sa inadlaw’ng serbisyo.

Gamit ang internet, mahibaw-an na sa mga konsumidor kon pila na ang monthly bill niini.

Alayon niini, gidasig ni BCWD Senior Public Relations Officer Ramil S. Barquin ang tanang konsumidor nga magpa-enroll sa Online Billing Inquiry (OBI).

Bugtong buhaton sa mga konsumidor mao lamang ang pag-browse sa website nga www.bcwd.gov.ph ug i-click ang OBI nga anaa nahimutang sa ibabaw nga bahin sa maong site.

Dugang ni Barquin, sundon lamang unsay gihatag nga instruction sa website diin i-fill up ang blangko nga porma ug pagkahuman, i-click ang Sign Up.

Gipasabot sa opisyal, kinahanglan sa konsumidor nga i-rehistro ang User Name ug ibutang usab ang Control Number nga anaa makita sa wala nga bahin sa gihatag nga blue bill gikan sa water district.

Butangan sa hingtungdang konsumidor og password aron makompleto ang rehistrasyon ug dili kini ma-abre sa laing konsumidor.

Angayan usab nga timan-an sa hingtungdan ang password aron kini makasulod sa sunod nga gamit.

Mahimong tan-awon ang kaugalingong account pinaagi sa pag-log in sa OBI gamit ang username ug password nga giparehistro aron makita kon pila ang monthly billing niini.

“BCWD Advisory (July 16, 2015): Keep track of your water consumption! Know your monthly water bill. Enrol in our Online Billing Inquiry. To enrol, visit www.bcwd.gov.ph, click “OBI” in the site header, fill up required field then click Sign Up. You need to register User Name, Control Number (found at the top left corner of your blue bill), and password. To view your account, log in to OBI using your username and password you registered,” awhag ni Barquin.