Libreng Serbisyo Gitunol

Ni Alex Mapoy

FREE SERVICES: Gisugdan sa DOJ-PPA Caraga sa pagtunol sa libreng serbisyo ang pagselebrar sa ika-39 ka tuig nga anibersaryo sa ahensya. Photo by Alex Mapoy

BUTUAN CITY – Gisugdan sa Parole and Probation Administration (PPA) Caraga sa pagtunol sa libreng serbisyo ang isa ka semana nga selebrasyon sa ika-39 ka tuig nga anibersaryo sa katukoran niini.

Ang nahisgotang selebrasyon gisaulog sa tibuok nasod diin matag buhatan, dunay managlahing kalihokan nga gipahigayon kinsang benepisyaryo mao ang mga kliyente.

Sa PPA-Butuan ug Agusan del Norte, napahimuslan sa gatosan ka mga kliyente uban ang tagsa-tagsa ka pamilya ang libreng serbisyo sama sa Medical and Dental Services, Health and Wellness Seminar, Story Telling, Body Massage, Haircut, Reading Eye Glasses alang sa mga hamtong, Feeding Program, ug pagpang-apud apod sa 50 ka sets sa mga School Kits ngadto sa kabataan.

Gikabutyag ni DOJ-PPA Regional Director Lina K. Burdeos, daghang kalihokan ang nakahan-ay sulod ning semanaha diin nagkadaiyang batakang serbisyo ang ipaabot ngadto sa mga kliyente.

Nanguna pagpasiugda sa maong kalihokan sila Chief Probation and Parole Officer Cristina R. Argente, Parole and Probation Office II Alex Castaños, Parole and Probation Office II Ester Samano, ug Chief Probation and Parole Officer Elizabeth O. Villaver sa PPO Agusan del Norte, Sr. PPO Blasito A. Rosales, PPO II Camille Stacy L. Apura ubos sa superbisyon ni RD Burdeos.

Ning tuiga, ang nahisgotang anibersaryo gisabak sa tema, DOJ-PPA @39: Sustaining Its Dynamism Towards the Effective Interplay of Environmental and Societal Changes.”

Kinasingkasing usab nga nagpaabot ang ahensya ngadto sa tanang nipaluyo sa maong kalihokan sama sa Butuan City Lions Club, Department of Health (DOH) Caraga, City Health Office Butuan, Philippine National Police (PNP) Caraga, Bureau of Jail Management and Penology (BJMP) Caraga, Technical Education and Skills Development Authority (TESDA) Caraga, Butuan City Volunteer Probation Aide Association, ug Agusan del Norte Volunteer Probation Aide Association.