Processing Fee Problema sa Agusanon

Ni Alex Mapoy

PROCESSING FEE: Pabiling suliran sa mga Agusanon 

ang processing fee sa dugo sanglit wala pay klarong LGUs 

nga niabaga sumala ni Teodoro Cairo, Chapter  Adminis-

trator sa PRC Butuan City – Agusan del Norte. 

Photo by Alex Mapoy

BUTUAN CITY – Gikomperma sa kadumalahan sa Philippine Red Cross (PRC) Butuan City – Agusan del Norte nga walay lokal nga kagamhanan sa probensya ang klaro nga ni-abaga sa processing fee sa dugo.

Hisayran sa probensya sa Agusan del Sur, walay problema ang mga residente kon hisgotan ang processing fee sanglit giabaga kini sa probensyal nga kagamhanan.

Sumala ni Teodoro Cairo, Chapter Administrator sa PRC Butuan City – Agusan del Norte, walay ni bisan usa ka lokal nga kagamhanan o Local Government Units (LGUs) ang nipasalig sa ilang buhatan nga kini maoy mo abaga sa processing fee sa dugo sa tanan niining konstituwente.

Dugang ni Cairo, dunay pipila ka LGUs ang niabaga sa processing fee sa pipila niini ka mga residente, apan, makonsidera kining case-to-case basis lang.

Sa maong kahimtang, kon kinsa kadtong residente nga dunay note, gikan sa mayor nga i-charge sa LGU ang balayrunon sa pagproseso sa dugo, kadto lamang ang malibre, apan kadtong walay dala nga note, magbago kini sa balayrunon nga moabot sa halos P1,800.

Alayon niini, gitambagan sa opisyal ang tanang residente sa Agusan del Norte nga kon magproblema kini sa balayrunon sa dugo, mas maayong mo dangop kini sa LGU kon asa kini nahisakop sa pamasin nga kini matabangan, apan kon mo largo kini  sa ilang buhatan, paninglan nila kini og processing fee.

Mahimo usab matod pa nga mo dangop sa Department of Social Welfare and Development (DSWD), Department of Health (DOH), o kaha sa Philippine Charity Sweepstakes Office (PCSO) aron kini matabangan sa pagbayad  sa proseso sa dugo.

Nanghinaut na lamang ang opisyal sa tanang lokal nga kagamhanan nga tabangan ang mga residente sa balayrunon niini sa proseso sa dugo aron dili mosamot ang gihambin niini nga problema.