Water System Gitunol

Ni Alex Mapoy

WATER SYSTEM: Gipangunahan nila Provincial Governor Ma. Angelica Rosedell “Angel” M. Amante-Matba ug Vice Governor Ramon AG. Bungabong ang pormal nga pagtugyan sa Barangay Hydraulic Water Ram Pump Water System Level II ngadto sa benepisyaryong residente sa Brgy. Lawan-lawan, Las Nieves Agusan del Norte. Photo courtesy of Aimee B. Sienes.

LAS NIEVES, Agusan del Norte – Dili matukib ang gibating kalipay sa direktang benepisyaryo sa Barangay Hydraulic Water Ram Pump Water System Level II human pormal kining gitugyan sa probensyal nga kagamhanan sa Agusan del Norte ngadto sa mga residente sa Brgy. Lawan-lawan lungsod sa Las Nieves sa nasangpit nga probensya.

Gipangunahan mismo nila Provincial Governor Ma. Angelica Rosedell “Angel” M. Amante-Matba ug Vice Governor Ramon AG. Bungabong ang pormal nga pagtunol sa naasoy’ng proyekto.

Nasayran nga dugay nang panahon nga gi-antos sa mga residente sa naasoy’ng barangay ang kawalay klarong tinubdan sa tubig nga limpiyo niining mainom.

Tungod sa paningkamot sa mga piniling opisyal sa naasoy’ng barangay ngadto sa probensyal nga kagamhanan, nahatagan og katumanan ang dugay nang damgo sa katawhan nga makabaton og tinubdan sa tubig nga luwas imnon sa katawhan sa naasoy’ng barangay.

Nanguna sa pagdawat sa maong proyekto si Lawan-lawan Barangay Captain More H. Migduyan uban ang mga konsehales niini ug mga benepisyaryong lumulupyo.

Sumala ni Aimee B. Sienes sa Kapitolyo Probensyal, gipahayag ni Gov. Matba ngadto sa mga benepisyaryong residente nga daghang tawo ang nagtinabangay aron lamang mahatagan og katumanan ang nasangpit nga pangandoy.

Dugang ni Gov. Matba, walay mahimo ang lider kon dili kini suportahan sa katawhan hinungdan nga angayang magtinabangay ang matag usa aron makab-ot ang unsay ikaayo sa komunidad.

Nitambong usab sa turnover ceremony ang mga piniling opisyal sa probensya ug apil sa nisaksi ang mga opisyales sa sikbit nga barangay sa pagpanguna ni Simbalan Brgy. Captain Walter Tuga uban ang mga konsehales niini.

Hisayran nga gisugdan paghimo ang maong proyekto adtong Oktobre 23, 2014 ug karon, napahimuslan na sa hingpit sa mga residente sa maong dapit.