Processing Fee sa Dugo Giusbawan

Ni Alex Mapoy

PROCESSING FEE:  Gi-angkon ni PRC Agusan del 

Norte – Butuan City Chapter Administrator Teodoro 

R. Cairo nga dunay umento sa balayrunon sa 

pagproseso sa dugo tungod sa pagmahal sa 

gikinahanglang gamit sa pagproseso. 

Photo by Alex Mapoy

BUTUAN CITY – Gikomperma sa kadumalahan sa Philippine Red Cross (PRC) Agusan del Norte – Butuan City nga giusbawan ang balayrunon sa pagproseso sa dugo.

Nasayran ang kanhi P1,500 nga processing fee sa dugo, gidugangan kini og P300 hinungdan nga mokabat na sa P1,800 ang kasamtangan nga blood processing fee.

Sumala ni PRC Agusan del Norte – Butuan City Chapter Administrator Teodoro R. Cairo, giusbawan nila ang processing fee tungod sa pagmahal sa gikinahanglang gamit alang sa pagproseso sa dugo.

Giklaro ni Cairo, bugtong gi-usbawan mao lamang ang service fee sa kantidad nga P300 hinungdan ang P1,500 nga processing fee, niabot na kini sa P1,800.

Sa kwentada sa opisyal, kon ang i-proseso nga dugo anaa lamang sa 350ml, ang mabayran sa processing anaa sa P1,350 plus service fee nga P300 hinungdan moabot sa kinatibuk-ang P1,650 ang mabayran.

Kon ang dugo nga i-proseso moabot sa 450ml o gitawag sa opisyal nga whole blood, ang bayran niini moabot sa P1,500 plus service nga P300 hinungdan nga moabot sa P1,800 ang mabayran sa processing.

Gitin-aw sa opisyal, ang maong usbaw sa processing fee ang aprubado kini sa Department of Health (DOH) ug gipatuman kini sa tibuok nasod.

Asoy pa sa nahisgotan, ang orihinal nga hangyo sa mga administrator sa PRC ngadto sa DOH, moabot sa P2,000 per bag ang processing fee, apan wala kini gipaboran sa ahensya.

Bisan wala natuman ang hangyo, gi-usbawan sa ahensya ang service fee og P300 hinungdan nga moabot sa halos P1,800 ang pagabayran sa processing.

Gisugdan ang implementasyon niini adtong Mayo 1, 2015, apan gi-oktaba kini sanglit wala na abisohan ang publiko pinaagi sa radyo, telebisyon, ug mantalaan kabahin niini, hinungdan nga gisibog ang pagpatuman niini adtong Hunyo 1, 2015.