Zero Backlog Namintina – NLRC

Ni Alex Mapoy 

ZERO BACKLOG:  Giklaro ni NLRC Caraga 

Administrative Officer V Robert M. Aying nga 

namintina sa rehiyonal nga buhatan ang zero 

backlog. Photo by Alex Mapoy

BUTUAN CITY – Gikalipay sa National Labor Relations Commission (NLRC) Caraga nga tanang kaso nga nahibilin sa 2014 ang hingpit nga nahusay sa ahensya.

Nasuta nga sa unang unom ka bulan ning tuiga, mokabat sa 351 ka buok kaso ang gihatagan sa pagtagad sa buhatan diin sa maong ihap, 110 niini ang gikan pa sa tuig 2014 samtang 241 niini ang nadawat sa 2014.

Sumala ni NLRC Caraga Administrative V Robert M. Aying, ang mga kaso nga nabitbit sa nakalabay’ng tuig ang hingpit nang nahatagan sa saktong husay.

Dugang ni Aying, ang kinatibuk-ang ihap sa mga kaso nga nadawat sa unang unom ka bulan, mokabat sa 230 ang nahusay lakip na niini ang 110 ka mga kaso sa nakalabay’ng tuig.

Nagtimaan kini nga mokabat sa 121 na lamang ka mga kaso ang nahibilin sa Hunyo 30 sa kasamtangang tuig kansang mga reklamo ang naduso sulod niining tuiga.

Pasigarbo sa opisyal, namintina sa rehiyonal nga buhatan ang zero backlog sanglit sulod sa unom ka bulan, ilang nahusay ang mga kasong naduso.

Gipaneguro sa opisyal, tanang kaso nga iduso sa mga reklamante ang hatagan kini og sulbad sulod lamang sa unom ka bulan gikan sa pagduso.

Ang sistema sa pag-atiman sa reklamo, pahayag sa opisyal mao ang “first come, first serve basis” diin pinaagi niini, walay reklamo nga imbes na una pagduso, mao na hinuon ang na ulahi sa pagtagad.

Tanang reklamo nga naduso ug nadawat sa buhatan ang patas nga gitagad ug gidesisyonan sibo sa mga ebidensiya ug argumento nga gipresentar sa duha ka habig.