Wednesday, July 15, 2015

SOA Enrolment Gidagsa

Ni Alex Mapoy
SOA ENROLMENT: Gatosan ang nagpa-enrol sa School on Air (SOA) sa Information Section sa DA Caraga kinsa gustong mahibalo sa mga estratehiya pangbatok sa climate change. Photo courtesy of DA Caraga Information Officer II Rhea C. Abao
BUTUAN CITY –Gatosan ka mga indibidwal ang malamposon nga na enrol sa School on the Air (SOA):  Rice & Climate Change sa nakalabay’ng semana, adlaw’ng Merkules.

Ang SOA gipasiugdahan sa Department of Agriculture (DA) Caraga partikular na sa Information Section kansang katuyoan mao ang paghatag sa saktong edukasyon lambigit sa panguma labi na sa nasinatiang pag-usab usab sa panahon.

Sa datos, kinatibuk-ang 258 ang na enrol sa SOA nga gilangkoban sa 97 ka mga estudyante sa kolehiyo, 20 ka mga instructor sa kolehiyo nga na gikan sa Agusan del Sur State College of Agriculture and Technology (ASSCAT), ug 141 ka mga rice farmers gikan sa kabaranggayan sa lungsod sa Bunawan.

Gikabutyag ni DA Caraga Information Officer II Rhea C. Abao, tuki-on sa upat ka bulan nga SOA ang kabahin sa Rice & Climate Change nga mabati sa matag adlaw’ng Bernes.

Nakita sa ahensya, dugang ni Abao, nga gikinahanglang maglusad og information campaign ngadto sa mga mag-uuma ug mga estudyante nga nagkuha sa kurso lambigit sa agrikultura.

Subay niini, gidasig sa opisyal ang tanang estudyante labi na ang mga nagkuha sa kurso may kalabotan sa agrikultura nga mahimo kining aktibo ug pahugtan ang relasyon ngadto sa kabatan-onan alang sa maayong ugma niini nga sektor.

Pinasikad sa pagtuon, ang sektor sa agrikultura maoy numero uno nga maapektohan sa kalit nga pag-usab usab sa panahon.

Ang maong sektor nagsalig lamang sa dagan sa panahon ug kon dili kini mahatagan sa insaktong giya, mabutang sa alanganin ang suplay sa pagkaon.

Sa tabang sa SOA, magiyahan ang nahisgotang sektor kon unsa nga mga paagi ang haum sa kalit nga pag-usab sa klima.

No comments:

Post a Comment