Pamuyo sa Coco Farmer Molambo

Ni Alex Mapoy

PRODUCT EXHIBIT: Sample sa Philippine Coconut Authority (PCA) Caraga sa geonet ug twinning nga ginama gikan sa bunot sa lubi. Photo by Alex Mapoy

BUTUAN CITY – Gilauman sa Philippine Coconut Authority (PCA) Caraga nga molambo pa ang kahimtang sa pamuyo sa mga coco farmers sa higayon nga mahimong fully operational ang Coco Coir Fiber Processing Plant sa Brgy. Mabuhay siyudad sa Bayugan.

Panglantaw kini ni PCA Caraga Acting Project Development Officer Grace Orilla subay sa nakaung-ong nga inagurasyon sa nasangpit nga pasilidad sulod ning bulana.

Sumala ni Orilla, dili maglisod ang mga coco farmer kon asa ibaligya ang ma-prodyus niining geonet o twinning sanglit anaa ang Department of Public Works and Highways (DPWH) ug mga mining companies nga andam mo palit niini.

Ang geonet ug twinning ginama gikan sa bunot sa lubi diin ang bunot galingon gamit ang Coco Coir Fiber Processing Plant ug i-proseso aron mahimong net ug pisi.

Nasuta nga mo kita ang mag-uuma sa lubi sa paghimo og twinning o pisi sa halos P180 ang adlaw samtang sa geonet, mokita usab kini og halos P400 ang adlaw kansang kita dako na kaayo og ikatabang sa papanginabuhian sa mga nahisgotan.

Dugang ni Orilla, mas bentaha gamiton ang geonet ug twinning sanglit eco-friendly kini.

Sa kabahinan sa DPWH, gamiton ang geonet isip banig sa bakilid aron mapugngan ang yuta nga dili mo dahili adiser tamnan og cover crop.

Sa mining usab, magamit ang geonet pagbanig sa mining ground alang sa pagahimuong restoration ug tamnan usab og cover crop aron mobalik ang kalunhaw.

“Ang number 1 market ana mao ang DPWH, mining companies nga ginagamit na nila ron sa DPWH, instead nga mo gamit sila og stone para dili mag-landslide ang yuta, ang geonet na ang ilang ginagamit. Tapos, tamnan nila og cover crops aron dili mag-landslide. Sa mining area, ang mining ground area nila, banigan na nila sa geonet ug tamnan gihapon og cover crops aron ma-restore ang area,” pagklaro ni Orilla.

Gikonsidera usab sa opisyal nga ang rehiyon maoy kampeon niini nga proyekto sanglit unay sa merkado ang mga coco farmer ug dili na kini mangita pa og buyer.

“Ang Caraga karon, kita ang nahulog nga champion ana nga project kay anaa sa atua ang market. Ang market nato ang mining kay daghan tag mining companies dire,” pagkomperma sa opisyal.