Sunday, July 12, 2015

School Principal Gibasol

Ni Alex Mapoy
DEPED ORDER: Gipamugos ni DepEd Caraga 
Spokesperson Dr. Isidro “Jun” Biol nga estriktong 
gidili ang pagpasulod sa mga outside vendors sa 
school campus ug makapamaligya og pagkaon. 
Photo by Alex Mapoy
BUTUAN CITY – Gibasol sa Department of Education (DepEd) Caraga ang mga hingtungdang school principal nga dunay mga estudyante nga nabiktima sa food poisoning sa Surigao del Sur area sa nakalabay’ng Bernes, Hulyo 10 sa kasamtangang tuig.

Sumala ni DepEd Caraga Spokesperson Dr. Isidro “Jun” Biol, dunay nagtunhay nga kamandoan ang departamento nga hugot nga gidili ang pagtugot sa mga outsider vendors nga mamaligya sulod sa eskwelahan.

Dugang ni Dr. Biol, tuig 2003 pa gipagawas ang maong kamandoan ug angayan unta kining ipatuman sa mga schood heads.

Gi-kwesyon pa sa opisyal ang mga school heads kon nganong nakasulod ang grupo nga libreng namaligya og Wendy products nga dunay flavour nga mango, durian, ug mangosteen.

Pahayag pa sa nauwahi, gikatingala sa rehiyonal nga buhatan kon nganong nakasulod ang maong grupo nga maoy gikaingon nga nalanag ang kabataan sa napalit nga kendi.

“Ang atong mga school heads unta lagi, ilang mandoan, ilang instructionan ang mga security guard, kon kinsa gusto mo sulod, mo baligya, dili man gyud kana gi-allowed. Matingala mi sa regional office, nganong nakasulod man ang uban? Nga namaligya man sa mga classrooms, room to room. Ngano man? Ngano man nakasulod sila sa tunghaan nga naa may mga security guards ang mga eskwelahan. Wala ba diay sila gi-instructionan sa mga school heads nga dili pasudlon kay bawal mana siya nga pasudlan og mga baligya?” tipik sa pamahayag ni Dr. Biol.

Subay niini, ipailawom sa re-orientation ang mga school heads aron dili masuble ang maong hitabo ug gipaneguro sa nahisgotan nga bunga sa hitabo, estriktong ipatuman ang nasangpit nga kamandoan.

Hisayran nga dul-an 2,000 ka mga estudyante ang nalanag sa gikaong kendi nga gibaligya sa grupo nga nakasakay og van gikan sa dakbayan sa Davao.

No comments:

Post a Comment