100 Kilos Spoiled Meat Nakompiska

Ni Alex Mapoy

SPOILED MEAT: Giklaro ni NMIS Caraga Senior Meat 

Control Officer Dr. Bernadette Montenegro nga dili 

double dead o brotcha nga karne ang nakompiska 

sa joint inspection team kondi spoiled meat lamang 

sukwahi sa nanggawas nga balita sa radyo. 

Photo by Alex Mapoy

BUTUAN CITY – Daling gilubong sa joint inspection team sa awtoridad ang halos isa gatos kilos nga karne human aktong nasusihan nga nanimaho gikan sa gikargahan nga storage van diha sa usa ka meatshop sa dalang Ochoa, Brgy. Limaha sakop ning siyudad adtong adlaw’ng Merkules.

Sa gihimong pagsusi, ang nanimaho nga mga karne naglangkob sa 69.54 kilos nga assorted cuts ug 30.3 kilos nga beef ribs.

Gilubong ang maong mga karne sa Slaughter area, Brgy. Obrero ning siyudad aron dili na makahatag pa og peligro sa panglawas sa katawhan.

Sumala ni NMIS Caraga Senior Meat Control Officer Dr. Bernadette Montenegro, wala nila damha nga maoy ilang maabtan ang nanimaho nga karne gikan sa storage van nga gipanag-iyahan sa meat shop.

Dugang ni Dr. Montenegro, dali nilang gikompiska ang maong mga karne aron maseguro nga malubong sa hustong lugar.

Sa asoy ni Dr. Montenegro, depensa matod pa sa store manager sa meat shop, gitakda nilang ilubong ang nahisgotang mga karne diin bugtong gihulat ang ubang karne  nga gihakot nga nangadaut usab aron mausa kini paglubong.

Nadaut matod pa ang maong mga karne tungod sa nasinatiang brownout ug wala usab nagamit ang ilang standby generator sanglit nadaut kini resulta sa pagkadaut sa karne.

Gitin-aw usab sa opisyal nga dili double dead o botcha nga mga karne ang nakompiska sa joint inspection team sukwahi sa unang nanggawas nga balita sa radyo kondi spoiled meat lamang kadto.

Ang pagkasapon sa nanimahong karne resulta kini sa subsob nga pagsusi sa joint inspection team nga naglangkob sa mga personahe sa NMIS Caraga, City Veterinary Office Butuan, ug City Sanitary Meat Inspector nga nadestino sa Slaughterhouse Compound, Brgy. Obrero ning siyudad.