Kampanya Batok Schistosomiasis Gipakusgan

Ni Alex Mapoy

SYMPTOM: Hulagway sa pasyente nga nataptan og Schistosomiasis. Courtesy of Google.

BUTUAN CITY – Doble kayod ang buhatan sa Department of Health (DOH) Caraga aron masumpo sa hingpit ang parasite nga Schistosomiasis ning rehiyon.

Hisayran nga mokabat sa 42 ka mga lungsod ug 244 ka mga barangay ang apektado hinungdan nga gikasa sa ahensya ang simultaneous mass treatment ning bulana.

Sumala ni DOH Caraga Regional Director Dr. Jose R. Llacuna, Jr. katuyoan niini nga makontrola ang morbidity sa naasoy’ng mga lugar pinaagi sa pagpahigayon og massive chemotherapy ngadto sa mga nataptang indibidwal.

KAMPANYA: Pursigido si DOH Caraga Regional 

Director Dr. Jose R. Llacuna, Jr. nga sumpuon ang 

Schistosomiasis. Photo by Alex Mapoy

Dugang ni Dr. Llacuna, tinguha sa rehiyonal nga buhatan nga mapailawom sa chemotherapy ang 85% sa kinatibuk-ang populasyon nga apektado sa maong parasite ning rehiyon.

Puntiryang edad nga mahatagan sa maong matang sa medikasyon mao kadtong mga indibidwal nga nag-edad 5 anyos hangtod 65 anyos.

Nasuta nga ang parasite nga ania ning rehiyon mao ang Schistosomiasis japonicum kansa maoy hinungdan nganong magkasakit ang tawong mataptan niini.

Ang Schistosomiasis usa ka “man-made in nature” ug makasulod kini sa tawo agi sa panit sa tabang sa cercaria nga makuha gikan sa mga suso.

Gitin-aw sa direktor nga sa early stage sa maong sakit, bati-on sa nataptang indibidwal ang pagpangatol sa panit, magdugo, mucoid stool, hilantan, ubo, kalibangaon, mo sakit ang tiyan, ug dysenteric.

Pasabot sa opisyal, matambalan ang pasyente pinaagi sa pag-eksamin sa stool, apan mas dali kining maayo kon mahatagan lamang dayon ang hingtungdan og tambal nga Praziquante.

Mapugngan ang pagkuyanap sa maong parasite pinaagi sa pagpahigayon og Case-finding and Treatment, Health Education, Environmental Sanitation, ug Snail Control.

Kini nga lakang gihimo sa rehiyonal nga buhatan isip pagsuporta sa deklarasyon sa sentrong buhatan sa ahensya diin ang bulan sa Hulyo gideklara nga Mass Treatment and Awareness Month for Schistosomiasis.