Reklamong Nadawat Niubos

Ni Alex Mapoy

HUSAY: Patas nga dunggon sa National Labor 

Relations Commission (NLRC) Caraga ang 

tanang reklamo nga nadawat sa buhatan ug 

wala kini dapigan nga habig, paneguro ni 

Administrative Officer V Robert M. 

Aying. Photo by Alex Mapoy

BUTUAN CITY – Mas ubos ang ihap sa mga reklamo nga nadawat sa buhatan sa National Labor Relations Commission (NLRC) Caraga adtong Hunyo kon itandi sa nakalabay’ng bulan sa Mayo ning kasamtangang tuig.

Pagkomperma kini ni NLRC Caraga Administrative Officer V Robert M. Aying subay sa datos nga gihikyad.

Basi sa datos, ang bulan sa Hunyo dunay reklamong nadawat ang buhatan nga moabot sa 47, mas ubos kon itandi sa bulan sa Mayo nga 50.

Katarungan ni Aying, mas taas ang ihap sa mga kaso nga nadawat sa bulan sa Mayo tungod sa mga empleyado sa Richmond Plywood Corporation nga nagdungan pagreklamo batok sa employer sa buhatan.

Hisayran nga gireklamo sa mga nahisgutan ang kabahin sa suholan ug nahatagan kini sa tukmang husay.

Una nang giklaro sa opisyal, ang tanang reklamo nga iduso sa mga reklamante sa buhatan ang patas nila kining dunggon ug desisyonan sibo sa mga argumento ug ebidensya nga gipresenta sa duha ka habig.

Mapasalamaton usab ang opisyal sa publiko labi na sa mga empleyado nga padayong nisuporta ug nisalig sa buhatan diin pinaagi sa pagduso sa reklamo kalabotan sa pagpangyatak sa employer sa diyutay nga katungod isip empleyado, mas mahatagan nila kini sa tino nga husay.