P6M Loan Puwede sa Membro

Ni Alex Mapoy

LOAN: Hangtod P6 milyones nga kantidad ang puwede mautang sa membro sumala ni Pag-Ibig Butuan Branch Manager Christopher Loon alang sa housing. Photo by Alex Mapoy

BUTUAN CITY – Sais milyones pesos (P6,000,000) nga loanable amount alang sa housing ang puwede nga ipautang sa Pag-Ibig ngadto sa matag membro niini.

Bugtong buhaton lamang sa membro mao lamang ang pagduso sa loan application ug uban pa nga gikinahanglang dokumento aron kini ma-aprubahan.

Sumala ni Pag-Ibig Butuan Branch Manager Christopher Loon, bugtong gikinahanglan aron ang membro maka-avail sa Housing Loan sa buhatan, kinahanglan duna kini pinakaubos nga 24 monthly contribution ug kinahanglan nga walay buslot ang remittance sa nakalabay’ng lima ka bulan.

Gipasabot ni Loon, makonsidera ang membro nga active kon wala kini buslot sa nakalabay’ng lima ka bulan hinungdan nga mahimo kining maka-avail sa housing loan nga gihanyag sa buhatan.

“At least, duna siyay 24 months nga contribution and active member siya. When we say active, for the last 5 months, walay patlang ang iyang remittance.  Ang pinaka-basic, 24 months contribution up to date,” pagpasabot ni Loon.

Hangtod P6 milyones ang puwede nga mautang sa membro kon kini dunay monthly contribution nga P3,000.

Kon ang monthly contribution sa membro, moabot lamang sa P200, ang loanable amount niini kutob lamang sa P250,000.

Ang P200 nga monthly contribution, ang P100 kuhaon gikan sa empleyado samtang ang employer’s counterpart mao usab ang nahibiling P100.

Pagklaro sa opisyal, dunay gisunod ang buhatan nga loanable amount bracket diin mahimo kining pilian sa hingtungdan kon pila ang kantidad nga pagautangon.

Niadtong dunay P200 nga monthly contribution, tambag sa opisyal, kon gusto kining mag-loan og P6 milyones, i-upgrade lamang ang monthly contribution diin ang buhaton, dugangan lamang og P2,800 ang existing contribution aron mahimo nang P3,000 ang monthly contribution.

“Depende sa loan amount bracket. Halimbawa, sa P250,000, kinahanglan duna kini contribution nga P200 ang bulan samtang ang pinakataas nga P6,000,000, nay P3,000 nga contribution per month. So, depende sa loanable amount. Kon duna tay existing basically ang monthly contribution is P200 ra man diin ang P100 sa employee ug P100 sa employer’s counterpart. So, i-upgrade lang na siya. Kon P6 million ang imong i-loan, dugangan lang ang existing contribution nga P200 og P2,800 aron moabot ang kontribusyon og P3,000,” pagtin-aw sa opisyal.

Tanang aplikasyon ug dokumento niadtong interesado nga mag-loan, iduso lamang kini sa buhatan sa Pag-Ibig ning siyudad.

Kutob sa madawat nga aplikasyon, ipailawom gilayon kini sa buhatan sa ebalwasyon, inspeksyon, ug appraisal.

Human makompleto ang proseso, ipadala dayon kini Pag-Ibig Butuan ngadto sa Cagayan de Oro aron masayran kon aprubahan ba ang kantidad nga gustong utangon sa hingtungdang membro sanglit ang Pag-Ibig Cagayan de Oro Branch maoy gihatagan og kagahom nga mag-apruba o dili sa naasoy’ng transaksyon.