Kabalaka sa Publiko Gibakwi

Ni Alex Mapoy

PAHIMANGNO: Tambag ni OCD Caraga Regional 

Director Liza Mazo nga dili maalarma ang publiko sa

food poisoning sanglit nadakpan na ang mga 

responsable. Photo by Alex Mapoy

BUTUAN CITY – Daling gibakwi sa kadumalahan sa Office of the Civil Defence (OCD) Caraga ang kabalaka sa publiko ug gitambagan nga dili angayang ma-alarma sa nahitabong food poisoning ning rehiyon.

Dul-an napulo na ka mga indibidwal ang nadakpan sa awtoridad ug nakompiska usab ang mga igbaligyang produkto.

Sumala ni OCD Caraga Regional Director Liza Mazo, dili angayang mabalaka ang publiko sanglit nadakpan na ang pipila ka mga suspetsado kinsa daling gipailawom sa interogasyon.

Dugang ni Mazo, managlahing anggulo ang gipanubayan sa awtoridad diin posibleng dili lang matod pa isyu sa pagkalanag kondi posible matod pang lakip niini ang isyu sa seguridad.

“The general public nga dili maalarma sa hitabo nga food poisoning. Daghang nanggawas nga estorya nga dili sa food poisoning lang, basin security issue siya,” pahayag ni Mazo.

Ang mga biktima sa food poisoning na gikan, sumala sa direktor sa mga lungsod sa Cagwait, Marihatag, ug Cantilan pulos sakop sa probensya sa Surigao del Sur; mga lungsod sa Tubod ug Mainit sakop sa probensya sa Surigao del Norte ug dakbayan sa Tandag.

Pipila sa gibati sa mga biktima human nakakaon sa produkto sa Wendy nga dunay flavour nga mango, durian, ug mangosteen mao ang pagpanakit sa tiyan, kalibanga, pagsuka, ug pagpanakit sa ulo.

Subay niini, gitambagan usab sa direktor ang tanang ginikanan nga tambagan ang mga anak nga dili magpataka pagpalit o kaha pagdawat sa mga pagkaon nga wala hibaw-i kon asa kini na gikan.

Mas maayo matod pa nga sa school canteen na lamang kini magpalit ang kabataan aron malikay sa posibleng pagkalanag.

Gitumbok sa direktor nga kasagaran nga nalanag nga estudyante mao kadtong namalit sa mga street foods.

“Lesson learn gyud ni nato mga ginikanan, ba. Atong mga anak, pahimangnoan nato permi. Dili magpataka og palit o pagdawat sa mga pagkaon nga wala ta kaila. Wala ta kahibalo asa gikan. Diha na lang ta magpalit sa canteen kay naa manay permit. Dili ta magpataka og palit sa gawas – mga street foods kay mao nay cause sa food poisoning labi na kadtong walay expiry date,” tambag sa direktor.