Sunday, July 12, 2015

Trip Off Timailhan sa Power Shortage?

Ni Alex Mapoy
TRIP OFF:  Gitin-aw ni PIO Danny Dela Cena nga dili 
makonsiderang nag-power shortage ang  Aneco tungod 
lamang sa kalit nga pagkapalong. Photo by Alex Mapoy
BUTUAN CITY – Dili makonsiderang kulang ang suplay sa kuryente nga gisuplay sa Agusan del Norte Electric Cooperative, Inc. (ANECO) sa tibuok service area tungod lamang sa kalit nga pagkapalong.

Una nang nanggawas ang kabalaka nga kulang ang suplay sa kuryente sa ANECO, Inc tungod sa nasinatian sa pipila nga kalit mapalong ang kuryente, apan kalit ra usab kini mo balik.

Gipasabot ni Aneco Public Information Officer Danny Dela Cena, ang kalit nga pagkapalong tungod kini sa kalit nga pagsaghid sa kahoy sa linya sa kuryente.

Dugang ni Dela Cena, mahitabo ang kalit nga trip off tungod usab sa dagan sa panahon diin mo kalit ang pag-ulan og sundan gilayon sa huyop sa hangin.

Kon hanginon ang kahoy, pagtin-aw sa opisyal, unya mo saghid sa linya sa kuryente, awtomatiko nga maputol ang suplay o mapalong ang kuryente.

Dunay higayon pa nga masablayan sa palwa, madat-ugan sa kahoy, ug daghan pang uban hinungdan nga mawala pagkalit ang kuryente, apan kon ang nahisgotan dili na masaghid sa linya, mo balik ra usab ang suplay niini.

Alang sa opisyal, kon masaghiran ang linya unya kalit nga mapalong ang kuryente ug mo balik ra usab kini dayon, nagtimaan lamang nga maayo ang estado sa sub-station sanglit awtomatiko kining mapalong.

Kon ugaling masaghiran ang linya unya dili mapalong ang kuryente, posible nga daut ang sub-station og mo mugna pa unya kini og kadaut.

Nahitabo kini gumikan ang linya sa kuryente ang walay putos hinungdan nga gamay’ng saghid sa bisan unsang butang, mawala ang suplay.

“Kasagaran sa mga kalit nga pagkapalong, labi na sa panahon nato, nuh, usahay mo ulan. Maghangin-hangin, normal gyud na siya, part sa operation nato, naa gyuy mga linya nato nga mangadaut kay masablayan o madat-ugan sa mga kahoy, mga palwa, so, mao nay hinungdan nganong kalit nga mapalong ang atong mga linya. Unya, matingala lang ta, pagkapalong, pagkataudtaud, mo balik ra dayon kay ang kahoy, kon mo hangin na sab, mo likay na man sab sa atong linya. So, bare wire man gud ni siya. Wala may putos ang atong mga linya, pagmasaghiran sa kahoy ang linya, otomatik pud mo trip off. Nagpasabot kini nga maayo ang atong sub-station kay kon masaghiran, mapalong man dayon ug dili makamugna og kadaut sa atong sub-station,” pagpasabot sa opisyal.

No comments:

Post a Comment