Rubber Industry Gipakusog, Pasilidad Gitunol

Ni Alex Mapoy

Gilauman nga makatabang ang Rubber Processing Plant sa pagpakusog sa industriya sa rubber sa probensya ug mo dako usab ang kinitaan sa mga benepisyaryo. Photo by Wilfredo Abrea

PROSPERIDAD, Agusan del Sur – Kampante ang kadumalahan sa Department of Agriculture (DA) Caraga nga mapakusog ang industriya sa rubber ning rehiyon human hingpit nga gi-inagurahan ang Crumb Rubber Processing Facility sa Brgy. San Vicente, Prosperidad, sakop sa nasangpit nga probensya adtong adlaw’ng Martes.

Gilauman sa rehiyonal nga buhatan nga dili lang mahimong rubber capital sa Caraga ang Agusan del Sur kondi posible nga mahimo pa kining rubber capital sa Mindanao sa tabang sa nasangpit nga pasilidad.

Ang nahisgotang pasilidad dumalahon sa Farmers Alternative Self-Reliance Multi-Purpose Cooperative (FARSMCO) sa nasangpit nga barangay.

Nahatagan og katumanan ang maong proyekto human gipundohan og balor P26.5 milyones sa Department of Agriculture - Mindanao Rural Development Program ilawom sa Community Fund for Agricultural Development (CFAD) uban sa pag-abag sa probensyal nga panggamhanan sa Agusan del Sur ingon man sa lokal nga kagamhanan sa lungsod sa Prosperidad.

Sumala ni Aurelius P. Arais sa DA Caraga, gipasabot ni DA Caraga Regional Director Edna Mabeza ngadto sa tanang nitambong sa inagurasyon nga ang katumanan sa maong proyekto nagpadayag lamang nga sento porsyentong gitabangan ug gisuportahan sa ahensya ang mga mag-uuma padulong sa dalan sa kalamboan.

Dugang ni Mabeza, pokus sa ahensya nga matabangan ang mga mag-uuma sa pagpakusog sa produksyon, pagpadali sa proseso, ug pagseguro nga mahalin gilayon ang produkto.

Gidasig usab sa direktor ang mga benepisyaryong mag-uuma nga gamiton ang pasilidad nga makagama sa de kalidad nga produkto aron dili kini madaplin kon kalidad ang hisgotan.

Malaumon usab ang opisyal nga pinaagi niini, molambo ang kahimtang sa panginabuhi sa mga benepisyaryo.

Ang nahisgotang kalihokan gitambongan nila DA Caraga Dir. Mabeza, MRDP Program Support Office Community Development Specialist Samson Mate, Governor Adolph Edward Plaza, 1^st District Representative Valentina, Mayor Albin Magdamit, ug uban pang piniling opisyal ingon man mga lumulupyo sa nasangpit nga dapit.