Senior Citizen Gipaalerto

Ni Alex Mapoy

METRO MANILA – Gipa-alerto sa Philippine Health Insurance Corporation (PhilHealth) ang tanang senior citizens sa tibuok nasod kabahin sa pagdagsa sa mga fixers.

Modus sa mga fixers, tabangan ang senior citizen nga maka-enrol o marehistro sa PhilHealth, apan magpabayad kini sa serbisyong gihatag.

Sa impormasyon nga gipaabot ni PhilHealth Central Office Information Officer Pinky G. Aragones, gitambagan ni PhilHealth President and CEO Alexander A. Padilla ang tanang senior citizens nga dili magpailad sa mga fixers.

Dugang ni Padilla, dili kinahanglan magdali ang senior citizen sa enrolment aron mahimo kining membro sa PhilHealth sanglit makapahimulos gihapon kini sa benepisyong gihanyag sa oras nga kini nanginahanglan – ma-anaa man kini nahuptang ID o wala.

Giklaro ni Padilla, bugtong ipakita lamang ngadto sa PhilHealth kon gusto kining mo avail sa benepisyo mao lamang ang nahuptang Senior Citizen’s ID ug ila na usab kining napaabot ngadto sa tanan niining accredited health care providers.

“In the first place, there really is no need to rush for enrolment since they can readily avail of PhilHealth benefits once they need it with or without a PhilHealth ID. They just need to present their senior citizen card and we have already coordinated with our accredited health care providers about this matter,”tambag ni Padilla.

Nasayran nga sukad gipatuman ang Republic Act (RA) 10645 o mas nailang Mandatory PhilHealth Coverage for All Senior Citizens, nagdasok ang mga senior citizens sa nagkadaiyang Local Health Insurance Offices aron ma-enrol sa nasangpit nga programa.

Sa maong kahimtang, nahatagan og kahigayonan ang mga fixers nga maka-biktima sa mga nahisgotan pinaagi sa paghanyag og serbisyo kansang serbisyo pagabayran sa hingtungdang senior citizen.

Pamugos sa opisyal, libre ang enrolment sa programa hinungdan nga walay ni bisan peso nga pagabayran sa mga nahisgotan.

“Do not deal with fixers. Enrolment in the program is free, wala po kayong dapat bayaran. Huwag ninyong hayaan na maging biktima kayo ng mga fixers,” pamugos sa opisyal.

Ilawom sa PhilHealth Circular 33, series of 2014, gidasig ang tanang senior citizen pag-enrol sa programa ngadto sa PhilHealth diin mahimo kining mo duol sa Office of Senior Citizens Affairs (OSCA) ug uban pang ahensya sa goberno nga makatabang sa nasangpit nga programa.