Pamuyo sa Agusanon Nilambo

Ni Alex Mapoy

Gikomperma ni Aneco PIO Danny Dela Cena nga nibentaha 

ang pamuyo sa mga benepisyaryo sa Sitio Electrification 

Program nga gipatuman sa buhatan. 

Photo by Alex Mapoy

BUTUAN CITY – Nibentaha ang ekonomikanhong kahimtang sa mga Agusanon human hingpit nga nakabaton og linya sa kuryente.

Dako ang nahimong kausaban sa mga sitio nga nahatagan og linya sa kuryente sanglit nahimo kining bibo ug daghan usab nga mga gagmay’ng negosyo ang namarug.

Sa estimate, lagpas na sa 200 ka mga sitio ang dunay linya sa kuryente sukad gipatuman sa Agusan del Norte Electric Cooperative, Inc. (ANECO) ang Sitio Electrification Program (SEP).

Gikabutyag ni Aneco Public Information Officer Danny Dela Cena, mokabat na lamang sa 21 ka mga sitio ang wala nahatagan og linya sa kuryente.

Kampante ang opisyal nga sa sunod hugna sa pagpatuman sa SEP, makabaton na og linya sa kuryente ang nahibiling mga sitio sa probensya.

Nasayran nga ilawom niini nga programa, ang pamilya nga naka-benepisyo nakapahimulos sa libre nga instalasyon, 2 ka libreng suga, ug libreng switch.

Gikalipay usab sa kadumalahan ni Aneco General Manager Arch. Horacio T. Santos nga nahimong instrumento ang buhatan sa pagpatuman sa programa sa nasudnong panggamhanan ni Pangulong Noynoy Aquino diin liboan ka mga Agusanon ang nakabaton sa linya sa kuryente.

Malipayon usab ang mga benepisyaryong residente nga nakapahimulos sa programa sanglit dunay kausaban ang ilang kahimtang sa pamuyo ug labaw sa tanan sa gipuy-ang komunidad diin kon kaniadto, sayo kining mangatulog, apan dihang nakabaton og linya sa kuryente, nahimong alegre ang ilang dapit panahon sa gabii gumikan kay duna naman kini kalingawan sama sa pagtan-aw og telebisyon o kaha pagkanta sa videoke.