Membro Gitambagan Pagkuha’g UMID Card

Ni Alex Mapoy

Sample sa Unified Multi-Purpose ID

BUTUAN CITY –Giawhag sa kadumalahan sa Social Security System (SSS) Butuan ang tanang membro sa buhatan nga magkuha og Unified Multi-Purpose ID.

Ang UMID card sa SSS mahimong magamit sa membro kon duna kini transaksyon sa Government Service Insurance System (GSIS), Pag-Ibig, ug PhilHealth.

Sumala ni SSS Butuan Assistant Branch Head Arnold Pepino, gamit ang UMID card sa SSS, makuhaan ang kahasol sa mga membro pagdala sa daghang ID kon duna kini himuong transaksyon sa gobernong buhatan.

Alayon niini, gidasig ang tanang membro nga mo kuha og UMID card pinaagi sa pagbisita sa buhatan o kaha sa satellite field office nga nahimutang sa Robinson’s Place Butuan.

Dunay pipila ka personahe sa PhilPost Butuan nga nadestino sa satellite field office aron manguha og hulagway sa membro nga maoy ibutang sa UMID card.

Gihimo sa lokal nga kadumalahan sa SSS Butuan nga dalhon ang serbisyo sa mall sa ingon dili na kaayo mahasol pa ang mga membro diin samtang nag-proseso sa UMID card, makahimo pa kini pag-shopping paghuman sa transaksyon.

Sa maong kahimtang, alang ni Pepino, dili na kaayo mahasol ang mga membro ug mas komportable pa ang nasangpit nga lugar.

Gi-angkon sa opisyal nga daghan pa sa mga membro ang wala nakakuha og UMID card hinungdan ang tanan gidasig sa pagkuha sanglit magamit kini kon ang hingtungdan dunay i-proseso nga claim benefits sa buhatan.