Nihiling sa Food Poisoning Victims Ipatawag

Ni Alex Mapoy

DOH Caraga Regional Director Jose Llacuna, Jr.

BUTUAN CITY – Plano sa Department of Health (DOH) Caraga nga ipatawag ang doktor nga naghiling sa 32 ka mga Grade 4 pupils kinsa nabiktima sa food poisoning diha sa Doongan Central Elementary School ning siyudad sa nakalabay’ng Bernes.

Tuyo ni DOH Caraga Regional Director Jose Llacuna, Jr. nga mahibaw-an ang tinuod nga hinungdan sa pagkahilo sa mga biktima human nakakaon matod pa sa giingong chocolate.

Niangkon si Dir. Llacuna, wala pa nila naka-estorya personal ang doktor nga nihiling sa mga biktima hinungdan nga isa niining mga adlawa, ilang ipatawag ang nihiling niini.

Bisan pa man, gikomperma sa opisyal nga daling nitunol ang rehiyonal nga buhatan og mga dextrose ngadto sa Agusan del Norte Provincial Hospital aron magamit sa mga biktima.

Sa bahin ni DOH Caraga Senior Health Program Officer ug kasamtangang Program Coordinator for Health Emergency Richard Maniago, gi-angkon sa opisyal nga dili pa nila mahatag ang saktong pagpasabot bahin sa maong insidente.

DOH Caraga Senior Health Program Officer 

ug kasamtangang Program Coordinator for 

Health Emergency Richard Maniago

Dumduman nga nakakaon ang 32 ka mga Grade 4 pupils sa expire nga chocolate human gihatagan ni alias Inday, 13 anyos ang mga nahisgotan nga pulos niini classmate.

Dili tuyo ni Inday nga hiluan ang mga classmate sanglit wala kini kasayod nga expire na ang maong chocolate.

Naila si Inday sa ilang tunghaan nga manggihatagon kon unsay anaa kaniya hinungdan nga dihang nakakuha kini og chocolate gikan sa ilang panimay, nanghatag usab kini sa iyang mga classmates nga maoy gikaingnan sa pagkabiktima sa food poisoning lakip ang nahisgotan.

Gipasabot ni Jojo Nequin, dihang gihinabi sa media nga adtong gabii sa Huwebes, gipalabay ug gipalubong na niya ang maong chocolates ug gidid-an pa niya ang mga sakop sa panimay nga dili kini kan-on.

Si Nequin maoy nagsagop kang Inday kinsa walay kasayoran nga gidala sa nahisgotan ang maong chocolates sa eskwelahan ug gipanghatag sa mga classmates.

Sa kasamtangan, luwas na ang tanang biktima lakip na ang 5 nga na grabehan sa gikaong chocolate.