Processing Plant Gitakdang Ilusad

Ni Alex Mapoy

Sample sa mahimong produkto sa Coco Fiber Processing Plant nga nahimutang sa Brgy. Mabuhay siyudad sa Bayugan. Photo by Alex Mapoy

BAYUGAN CITY – Gitakdang ilusad sa Philippine Coconut Authority (PCA) Caraga ang Coco Coir Fiber Processing Plant nga nahimutang sa Brgy. Mabuhay sakop ning siyudad sa hinapos nga bahin ning bulana.

Mokabat sa P15 milyones nga pundo ang gibubo sa Japan-Asean Integration Fund (JAIF) alang sa katumanan sa naasoyng proyekto.

Sumala ni PCA Caraga Acting Project Development Officer Grace Orilla, bugtong gihulat na lamang mao ang paghuman sa gitukod nga building nga maoy himuong planta.

Ang nahisgutang planta gipabarug sa isa ka ektaryang luna nga gi-donar sa Brgy. Mabuhay sakop ning siyudad.

Dugang ni Orilla, anaa na ang makinarya nga gamiton sa maong planta hinungdan nga mahimo na kining mapahimuslan sa mga coco-farmers sa higayon nga hingpit na kining malusad.

Gitin-aw sa opisyal, bugtong papel sa rehiyonal nga buhatan mao ang pagpatuman sa nahisgutang proyekto samtang ang JAIF maoy naghatag pundo alang sa katumanan sa maong planta.

Lauman nga mahimong pinasidunggang bisita sa paglusad sa proyekto mao si Presidential Assistant for Food Security and Agricultural Modernization Sec. Francis “Kiko” Pangilinan.

Sa inisyal, mokabat sa 1,700 ka mga mag-uuma sa lubi o coco farmers ang mahimong benepisyaryo sa naasoy’ng proyekto.

Gamiton ang maong planta alang sa pagproseso sa bunot sa lubi aron kini magamit og mapahimuslan.

Nalantawan sa opisyal nga pinaagi sa maong proyekto, madugangan ang kinitaan sa mga mag-uuma sa lubi ug labaw sa tanan, mas mo bentaha ang kahimtang sa pamuyo niini.