Pre-Marriage Counselling Gilab-as

Ni Alex Mapoy

AGUSAN DEL SUR – Subleng nalab-as ang kahibalo sa Pre-Marriage Counselling (PMC) team gikan sa kalungsoran sa Agusan del Sur human napailawom sa tulo ka adlaw nga refresher course nga gipasiugdahan sa Population Commission (PopCom) Caraga.

Nahitabo ang maong kalihokan tungod usab sa inisyatibang gihimo sa probensyal nga kagamhanan sa Agusan del Sur.

Katuyoan niini nga mas mapalambo ug malab-as ang nakat-onan sa mga PMC counsellors aron maseguro nga epektibong mapatuman ang PMC program sa matag lungsod sama sa pagpahigayon og PMC sessions nga salmotan sa magtiayon, ug pag-awhag sa magtiayon nga suportahan ang nahisgutang programa.

Pinasikad sa Joint Memorandum Circular No. 01 - 2010 tali sa Department of Interior and Local Government (DILG), Department of Health (DOH), Department of Social Welfare and Development (DSWD), ug Commission on Population (PopCom), ang PMC team maglangkob kini sa Population Officer, isip team leader; Pre-Marriage Counsellors gikan sa City/Municipal Health and Nutrition Office, City/Municipal Social Welfare Development Office, City/Municipal Population and Development Office, City/Municipal Agriculture Office, Department of Education City/Municipal District Office, civil society, ug faith-based organizations.

Gipasabot ni PopCom Caraga Regional Director Alexander A. Makinano, ang papel sa PMC counsellors mao ang paghatag sa magtiayon sa mga sensitibong impormasyon kabahin sa marriage and relationships, responsible parenthood, maternal and child health, family planning ug home management.

Pamugos sa direktor, angayan lamang nga ang magtiayon dunay igong kahibalo kon unsaon nga mahimong magmalamposon ang kaminyuon ug pag-atiman sa pamilya.