Membro Nikita Na, Nihimsog Pa – DA

Ni Alex Mapoy

PATONG-PATONG RIC PRODUCTS: Nadugangan ang kinitaan sa mga membro ug nihimsog pa ang panglawas tungod sa pagkonsumo sa ginamang produkto. Photo courtesy of Vanessa Sanchez.

MADRID, Surigao del Sur – Doble benepisyo ang natagamtaman sa 42 ka mga membro sa Patong-patong Rural Improvement Club (RIC) sa Soya Milk Production project nga nahimutang sa Brgy. Patong-patong, Madrid, Surigao del Sur.

Nasuta nga wala lang nikita ang mga membro sa nahisgotang proyekto kondi natabangan usab kini nga magpabiling himsog ang panglawas pinaagi sa paghangop ug pagkonsumo sa ginama niining produkto.

Sumala ni Vanessa Sanchez sa Department of Agriculture (DA) Caraga, ang mga membro sa RIC nakapahimulos sa livelihood project sa ahensya partikular na sa Support to Emergency and Livelihood Assistance Program (SELAP) sa nakalabay’ng tuig.

Dugang ni Sanchez, gipili sa grupo ang naasoy’ng proyekto human nasuta nga potensyal sa soybean ang maong probensya.

Gihatagan sa ahensya ang maong grupo balor P300,000 isip puhonan sa proyekto diin ang uban gipalit sa gikinahanglang ekipos sa pagproseso og soya milk ug pagpabarug sa gamay’ng sari-sari store.

Saysay ni Patong-patong RIC President Jocel Crizaldo, gibansay ang ilang grupo kabahin sa soybean processing isip kabahin sa project package.

Nakasugod ang grupo sa ilang negosyo adtong Oktobre 2014 diin gibaligya ang ilang soya milk product sa napabarug nga sari-sari store.

Gawas niana, nakig-alayon usab ang grupo sa nagkadaiyang tunghaan aron tugtan nga makapamaligya sa ilang produkto sa school canteen sa kantidad nga tag – P15 ang botelya.

SOYA COFFEE: Nakatabang sa pagmintina sa kahimsog sa panglawas

Nikusog ang halin sa produkto sa RIC hinungdan nga gisudlan sa grupo ang paghimo og kape kansang sangkap gikan sa soybeans sugod sa nakalabay’ng bulan sa Pebrero sa kasamtangang tuig.

Inanay matod pa kining gihangop sa mga Surigaonon ug gibaligya sa merkado sa tag – P200 ang kilo.

Sa inanay nga pagdako sa merkado sa grupo, mas nikita usab kini ug daghan ang nipadayag nga natabangan ang ilang panglawas human kini nakainom sa soya milk ug soya coffee.

Nahimong himalitan ang produkto tungod sa nutritional value niini diin ang nag-unang konsumidor mao ang sektor sa mga senior citizen.

Si Jesucita Bringen kinsa dugay nang nag-antos sa sakit nga arthritis, apan dihang nakainom kini sa soya milk ug soya coffee, nawagtang ang maong sakit ug namatikdan nga inanay’ng nibalik ang iyang kabaskog.

Gawas kang Bringen, nakabenepisyo usab si EJ Palomar kinsa niwang kaniadto ug luyahon, apan dihang nakainom sa produkto sa Patong-patong RIC, nahimo kining lagsik ug inanay’ng nadugangan ang timbang.

Daling gitabangan sa kagamhanang lokal sa Madrid ang paningkamot sa Patong-patong RIC pinaagi sa Municipal Agriculture Office diin nananom kini og soybeans sa lungsod aron matod pa madugangan ang suplay nga soybeans nga gikinahanglan sa grupo.