Beach Resort Owners Gipahimangnuan

Ni Alex Mapoy

Tinguha sa DENR Caraga nga ang nahitabo sa pipila ka bahin sa Boracay area
nga gilumotan, dili mahitabo dinhe sa rehiyon. 

BUTUAN CITY – Nakig-alyansa ang Department of Environment and Natural Resources (DENR) Caraga ngadto sa counterpart niining buhatan ang Environmental Management Bureau (EMB) aron mamintina ang kahinlo sa baybayon ning rehiyon.

Sa tabang sa EMB Caraga, kampante ang DENR Caraga nga mamintina ang kahinlo sa kabaybayonan labi na kadtong dagsaonon og mga turista.

Gawas niana, gipahimangnuan sa kadumalahan ni DENR Caraga Regional director Nonito M. Tamayo ang tanan nga nanag-iya og beach resorts ingon man commercial establishments nga manglimpiyo sa palibot ug imintina ang kahinlo sa baybayon aron luwas kining kaliguan sa mga turista nga makabisita sa lugar dis-a gitukod ang nasangpit nga pamatigayon.

Tumong usab ni Tamayo sa pakig-alyansa sa EMB aron kadtong gitawag nga informal settlers kinsa namuyo daplin sa baybayon nga mapahimangnuan nga i-obserba ang kahinlo sa baybayon ug kanunay kining luwas nga kaliguan.

Gihimo kini sa opisyal aron dili maapektohan ang turismo sa rehiyon ug nalantawan usab sa nahisgutan nga gumikan sa padayong kainit sa panahon nga nasinatian, padayong mo dagsa ang mga turista ning rehiyon tungod sa kadaghan sa mga dapit nga nindot kasuruyan.

Labot niana, nagpagawas og pahimangno ang direktor human nasinatian sa kadagatan sa Boracay ang pagsulpot sa gitawag nga “green and slimy algae” kansa nakahatag kahasol o disturbo sa mga nangaligo sa maong dapit.

Tinguha sa opisyal nga ang nasinatian sa Boracay, dili kini masinatian sa rehiyon.

Hinuon, gi-angkon sa nahisgutan nga ang pagsulpot sa mga lumot sa baybayon, makonsidera kining normal panahon sa ting-init, apan, mahimong malikayan ang pagkuyanap niini kon ang tanan nga nanag-iya og beach resorts, batasanon ang pagpanglimpiyo sa baybayon ug ilabay ang mga basura sa saktong labayanan.