Iro sa Agusan, 35% Nabakunahan

Ni Alex Mapoy

Provincial Veterinarian Dr. Belen Aruelo.
Photo by Alex Mapoy

AGUSAN DEL NORTE – Gibanabana nga anaa na sa trayntay singko porsyento (35%) sa kinatibuk-ang ihap sa mga iro nga target bakunahan sa Agusan del Norte Provincial Veterinary Office sulod ning tuiga.

Hisayran nga target sa buhatan ang 15,000 ka mga iro nga mabakunahan sa tibuok probensya sulod ning tuiga aron hingpit nga mabatokan ang sakit nga rabies nga makuha gikan sa mga mananap sama sa iro.

Sa kinatibuk-ang ihap, mokabat na sa 5,250 ka mga iro ang nabakunahan sugod gisugdan ang pagpamakuna adtong bulan sa Enero sa samang tuig.

Gikabutyag ni Provincial Veterinarian Dr. Belen Aruelo, target sa buhatan nga pag-abot sa “mid-year,” lagpas sa 50% sa kinatibuk-ang ihap sa mga iro ang mabakunahan.

Dugang ni Dr. Aruelo, kini ang hinungdan nga subsob ang ilang gihimo nga pagpamakuna sa ingon makab-ot ang target nga ihap.

Isip pagseguro, padayong gipa-aktibo ang tanan niining counterpart sa ka munisipyohan sa probensya.

Nagpahigayon na og barangay – to barangay visitation ang mga personahe sa buhatan aron dalhon sa komunidad ang serbisyo nga alang sa katawhan.

Ning panahona, kampante ang opisyal nga makab-ot ang nahisgutang target labi pa nga duna pay igong panahon alang sa pagpamakuna.

Gi-awhag lamang sa opisyal ang tanang Agusanon nga suportahan ang maong kalihokan sanglit alang ra usab kini sa kaayohan sa tanan.

Niadtong wala nakapabakuna sa binuhing kahayopan sama sa iro, tambag sa opisyal nga mas maayong dalhon kini ngadto sa Municipal VeterinaryOffice sa ingon kini mabakunahan.

Subleng giklaro sa opisyal nga dili angayan nga mabalaka ang mga Agusanon kon bakunahan ang binuhing hayop sanglit ang itunol nga serbisyo ang libre.